Zawba 33

¹ “Khâpa rai châ sala Zawba y, ei biereipa he nahthlie tua la, ei bie zydua liana heta na nah pachôh tua.

² Nahthlie teh, ei pakah âpa ta; ei paleih ta bie ei reih hih.

³ Ei biezy ta ei palôh dona zie palâsa ta, ei hmao chhao chata a hmo hmôpa zy cha a chado ngaitapa ta a reih.

⁴ Khazohpa thlahpa chata na tao ta, Atotaotheipa chata hrona husona eina pie.

⁵ Na thei khiahta la nâ chhy teh; ei hmiakô liata thapi phia la; na biezy a dopa ta pachâ teh.

⁶ Khazohpa hmiakô liana cha nâ hawhpa ei châ; kei chhao beihlei tawhta taopa ei châ hra.

⁷ ei chichhihna ta cha pachisa aw va na; cha tah tu aw va na.

⁸ “Ei nah theina liata reih haw tlai chita. nâ na bie parona zie chhao ei thei haw.

⁹ Taopasina hnei va na, ei pathaih na; keima liata moleina y vei, ei pathaih thlâh haw.

¹⁰ Ei chô liata ryhpaona tlua ta, a khakhaipa lâta eina reih;

¹¹ ei pheizy liata keihrai na daih ta, ei siena zydua a laichadai,’ tah chi ta.

¹² “Ei châ chhy aw na. He kyh liana heta a do va chi. Khazohpa cha chyhsa hlâta a rôhnah via mâ tâh.

¹³ ‘Kawh kha hmahta nâ chhy vei’ tahpa ta khazia ano nâ dyuh?

¹⁴ Khazohpa chata kyh kha liata a reih, ky no ta chhao, châhrasala chyhsa ta pahno thai vei.

¹⁵ Mâ ta, zâ ta aluahna liana chata, rakhô liata amâ mô lichih na kha ta,

¹⁶ chyhsa zy nahkhao cha pahy ta, ama theipa cha pa-i ta,

¹⁷ chyhsa cha a hmotaopa pathleisa ta, a palaina cha nyupa ta a y theina awpa ta;

¹⁸ thlâ lâta a khô lei nawpa ta a vao ta, a hrona chhao zaozi tawhta a leidia lei nawpa ta.

¹⁹ “Chyhsa cha pasana ta a rakhô liana cha chhorei ta, arupa zydua chaibawh ngâpa ta;

²⁰ chatawhcha pati zy a hao ta. sâh pahâh ngaitapa chhao khoh leipa ta.

²¹ A sapa thata zaoh ta hmô chhopa chhao châ khao vei, a rupa sai ta y thlâh ha ta.

²² A thlahpa cha thina thlâ kiah a hnia ta, a hrona chhao chata thina a vaw tlôkheituhpa zy a hnia.

²³ Vâlyuhchâpa, sazy hry liata pakha chhâ y sala; Khazohpa nata chyhsapa likawh ta lyuhchâpa chata, chyhsapa ta hmo a tao phapa zy chho pasi sala, thi thei leina chyhsa pahno ta piepa cha a hmô thei nawpa ta;

²⁴ chyhsapa ngiachhiena lâta a rei khiahtala a hnohta, Thlâ lâta a khô hlâta pachha mah y, chatlaina ei hmô ha na;

²⁵ a sapa cha vaw thyu pathi heih sala, a thyutlia thatlôna cha vaw kua heih se,’ tahpa ta.

²⁶ Chyhsapa cha Khazohpa lâta hiah ta, ano chata a vaw pyh ta, a ly ngaitapa ta a hmia cha a hmô aw. Chyhsa zy hnohta a pachhana cha pie pakhua aw ta,

²⁷ chyhsazy hmiakô ta hla sapa ta, ‘Molei na ta, hmo dopa cha paraona ta, châhrasala viari na thô vei.

²⁸ Ei thlahpa cha thlâ lâta khô leipa ta na pachha ta, ei hrona chata khaihna a hmô aw’ tahpa ta.

²⁹ “He hmo zydua he ei no nata ei thôh ta a tao; Khazohpa ta chyhsa ta chyhsa hnohta a tao,

³⁰ chyhsa ta thlâ tawhta a vaw kua thei nawpa ta, hrona khaihpa a hmô thei nawpa ta.

³¹ Zawba y, pakhâ ta naw nahthlie teh; a chalih la, ei vaw reih tua aw.

³² ei nawhpa na pahno khiahtala nâ chhy mah y; reih mah y, thai cha pachâsa awpa ei khoh.

³³ A y vei khiahtala na nahthlie mah y; a chalih la, sona ei cha pachu aw,” tah ta.