Zeremiah 42

¹ Chatawhcha pheisaih sahlao hyutuhpa zydua nata Kariah sawchapawpa Zôhana nata Hôshiah sawchapawpa Zezaniah nata zawpi zydua, a chyh chaipa tawhta a lai chaipa taihta a vaw hnia ei ta,

² hrohsopa Zeremiah hnohta, “Na hmiakô liata eima hiana a pyhpa châ sala he a y chhôhpa zydua zy châna tlai heta ABEIPA na Khazohpa liata thlah maniah chhâpa awpa ta eima châ haw; maniah na hmôpa hawhna tlai heta chyhsa hluhpi zy hry tawhtapa a chyhta dei siesaipa ta y tlôh pi ta.

³ ABEIPA na Khazohpa ta eima sie nawpa lâpi nata eima tao awpa hmo maniah a pahmô thei nawpa ta,” tah ei ta.

⁴ Hrohsopa Zeremiah chata ama hnohta, “Nama bie cha ei pahno na; nama bie lymâ hawhta ABEIPA nama Khazohpa hnohna chata thlah ei chhâ aw na. ABEIPA ta a châ chhyna maih cha ei cha chho lymâ aw ei; nâmo liata khâpa hmah phih aw va na,” tah ta.

⁵ Chatawhcha âmo chata Zeremiah hnohta, “ABEIPA na Khazohpa ta eima hnohta a cha tuapa bie zydua lymâ hawhta eima tao tlai vei khiahtala eima hry liata ABEIPA cha bie a pahnotuhpa dopa nata ngâchhihpa châ mawh sy.

⁶ A pha tlyma, a chhie tlyma eima cha tuah na, ABEIPA eima Khazohpa ao cha eimâ ngiah thlyu aw na, ABEIPA eima Khazohpa ao eimâ ngiah khiahta cha eima châta a pha thei nawpa a châ,” tah ei ta.

⁷ Noh hrawh tawhna chata ABEIPA bie cha Zeremiah hnohta vaw tlô ta.

⁸ Chatanachata Kariah sawchapawpa Zôhana nata a hnohta pheisaih sahlao hyutuhpa a ypa zydua nata zawpi zydua, a nawh chaipa tawhta a lai chaipa taihta aw ei ta,

⁹ âmo hnohta, “ABEIPA Izarel Khazohpa ta a hmiakô liata nama hiana tlôkhei nawpa ta eina tuapa eichi khata he tana heta a tah na:

¹⁰ He râh liana heta nama y thlâh khiahtala cha padua aw ei na ta, cha phih aw veih ei na; cha lo aw ei na ta, cha phia aw veih ei na; nama chô liata hmopha leipa ei patlôsapazy cha roh ha tlôh na ta.

¹¹ Babylaw beipa nama chi tyhpa cha chi khao khah u; ano cha chi khah u, ABEIPA ta a tah, a ku tawhta cha pachha awpa nata papua awpa ta nama hnohta y tlôh na ta.

¹² Nâmo chô liata ngiachhie thei nawpa ta ngiachhiena cha pasai aw ei na ta, nama râh lâta tlai ei cha pakuasa heih aw ei.

¹³ ‘He râh liana heta pahrâ aw ma pi,’ tahpa ta ABEIPA nama Khazohpa ao cha namâ ngiah vei khiahtala,

¹⁴ ‘Châ vei, Izi râh lâta tlao eima sie aw, cha liana chata adyuhna rai a tyh aw ma pi, chiahmie paropa pyu chhao pahno leipa aw pi ta, nie phahlana chhao y hra aw vei,

¹⁵ cha liana chata eima pahrâ aw,’ nama tah khiahta cha. Hy Zudah pahlôhpa ta a y chhôhpa saih u, ABEIPA bie cha thei teh u. Pheisaihzy ABEIPA, Izarel Khazohpa chata he tana heta a tah: Izi râh liata a ngia awpa nata cha liata pahrâ awpa ta nama hmiazy namâ heih raruah khiahtala,

¹⁶ nama chipa zaozi chata Izi râh liata a cha pha aw ei, chakâhna nama chipa chhao khata Izi râh liata cha zi lymâ aw ei ta, cha liana chata nama thi aw.

¹⁷ Izi râh liata pahrâ awpa ta a heih raruahtuhpa zydua cha cha hawhna chata y aw ei ta, potlanazy ta ama thi aw; vâchhiena âmo chô liata ei patlôsa awpa tawhna chata ahy hmah ta puapa ta a boh aw veih ei.

¹⁸ Pheisaihzy ABEIPA Izarel Khazohpa chata he tana heta a tah: Zerusale liata a pahrâpazy chô liata ei hiehâhna nata ei pathi-iana ei lei thlupa hawh hra ta, Izi râh namâ ngia tina chata nama chô liata ei hiehâhna ei leitha hra aw. Chhiesapa nata noâhna nata pakah my papaina reipachhiepa châ aw eichi ta. He su he hmô khao veih eichi.

¹⁹ Hy Zudah sahlao laibâhpa saih u, ABEIPA chata nama chô liata a reih haw hih, Izi râh liana chata a ngia khah u, ‘He noh liana heta ei cha pahno pasiasa ei tahpa pahno teh u,

²⁰ nama hrona pahlei awpa ta nâmosasyh ta nama dôpa ta a châ. ABEIPA nama Khazohpa hnohna chata ABEIPA eima Khazohpa ta a tahpa maih cha maniah chho la, eima tao lymâ aw,’ tahpa ta eina tuapa eichi kha châ ta.

²¹ He noh liana heta nama hnohta ei phuah haw hih, châhrasala nâmo hnohta eina tuana khâpa ta hmahta ABEIPA nama Khazohpa reikah cha a ngiah tlôh lei khâh eichi ta.

²² Chavâta atahmâ pahno teh u, pahrâ nama byuhna su tlai liana chata zaozi zy, chakâhna zy, potlana zy ta nama thi tlai aw, tahpa ta,” tah ta.