Athaona 38

¹ Cha nona chata Zudah cha a uhnawhpazy tawhtapa zu ta, Adula chyhsa pakha a moh Hira lâna cha za tlô ta.

² Zudah chata cha liana chata Kana zuah, a moh Shua sawchanônô hmô ta, chatawhcha ano cha hnei ta,

³ saw phaoh ta, sawchapawpa sa ta, Zudah ta, a moh Era bi ta.

⁴ Chatawhcha saw phaoh heih ta, sawchapawpa sa ta, a nô ta a moh Ônana bi ta.

⁵ Sawchapawpa sa heih ta, a moh ta Shela bi ta, cha a sa nona chata ano cha Cheziba khih liata y ta.

⁶ Zudah chata a saw tuapa Era cha, lahpinô hneipa ta, a moh cha Tamari châ ta.

⁷ Zudah sawtuapa Era cha ABEIPA mohmô ta moleipa châ ta; ABEIPA ta ano cha thie haw ta.

⁸ Chatawhcha Zudah chata Ônana hnohta, “Na uhta lahpinô cha y khei la, vahpa uhnawhpa tao awpa cha taopa la, na uhta châta chi pathla pa mah y,” tah ta.

⁹ Ônana chata chi pathla awpa cha ano pathla châ aw vei tahpa pahno ta; chatanachata he a uhta lahpinô a ykheina maihta, a uhtapa châta chi a pathlapa lei nawpa ta alei liana chata pathla tyh ta.

¹⁰ Chatawhcha a hmo taozie cha ABEIPA mohmô lianachata, molei ngaitapa châ ta, ano chhao cha thie haw ta.

¹¹ Zudah chata a myuhnô Tamari hnohna chata, “Ei sawchapawpa Shela he, a pitloh hlâ lei cha na paw o lâta vahpa hnei leipa ta vaw y chy mah y,” tah ta. “Chata leipa ta cha ano chhao he a uhtazy hawhta a thi pathlei aw na,” tah ta. Tamari cha a paw o lâna chata y haw ta.

¹² Chatawhcha a noh hropa ta cha, Shua sawchanônô Zudah lahpinô cha thi ta; Zudah cha palôhtlâhpa ta a y nata Timnah khih liata a mietahkupa hmia ngyutuhpa lâna chata, ano nata a viasapa Adula chyhsa Hira cha khy ei ta.

¹³ Chatawhcha chyhsa ta Tamari hnohta, “Na parâhpa cha a mietahkupa hmi ngyu awpa ta Timnah khih lâta a khy aw,” tahpa ta chho ei ta.

¹⁴ Chatanachata ano chata, a vahpa mâchhiesana chysiazy cha pahluh ta, a khuna poh ta a khu ta, khâchâ a pahly ta, Timnah khih lâpi Enai kuh chhikao liana chata a vaw tyuh ta. Shela cha pitloh haw tlôh ta, ano lahpinô châta piepa a châ leipa pahno thlâh ha ta.

¹⁵ Zudah chata ano cha a hmô nahta sihrypa ta rao ta, a hmia khâchâ a khu tlôh ta.

¹⁶ Lâpi kiah liata chanô lâna cha kei pangai ta, “A vy teh, ngiachhiepa ta a zia khoh ei si,” tah ta. A myuhnô kha a châ tahpa pahno tlôh lei khâ ta. Ano chata, “Einâ ziakhei khiah chi ta cha, khâpa e eina pie aw chi?” tah ta.

¹⁷ Ano chata, “Sahroh zaw hry liatahpa mie taw ei cha paphao aw,” tah ta. Ano chata, “Cha cha na paphao hlâta sôka châta khâpa chhâ tlyma eina pie aw chi ma?” tah ta.

¹⁸ Ano chata, “Sôka châta khâpa ei cha pie aw?” tah ta. Ano chata, “Na moh chahnaona nata na khawhri, na chôhchahrei chabapa chhao khata,” tah ta. Chatanachata pie ta, a ziakhei ta, ano liana chata saw phaoh ta.

¹⁹ Chatawhcha thyu ta, a khuna poh hlai ta, a nôhmei châna chysia cha a ky heih ta.

²⁰ Chatawhcha a sôka cha chanô ku tawhtapa cha la awpa ta a viasa Adula chyhsa ku liana chata mie taw cha paphao ta, châhrasala ano chata, ano kei hmô tlôh leipa ta.

²¹ Chatanachata chanô yna su liata chyhsazy hnohna chata, “Lâpi kiah Enai sihrypa a ypa kha, khataihlâ a y haw?” tahpa ta hiahri ta. Âmo chata, “Sihryhpa rai he liana heta y veih ei,” tah ei ta.

²² Chatanachata Zudah hnohna chata kua heih ta, ano cha, “Hmô thei va na, a su liata chyhsazy chhaota, ‘Sihryhpa rai he liana heta y veih ei,’ tah hra ei ta,” tah ta.

²³ Zudah chata, “Hnei palâh thlâh ha se, chata leipa ta la ei maohphyu pathlei aw na; he mie taw he paphao na ta, ano hmô thei tlôh lei khâh chi ta,” tah ta.

²⁴ Chatawhcha thla thôh tlyma tawhna chata, chyhsa ta Zudah cha, “Na myuhnô Tamari chata, sihryhpa ta y ta: cha leipa chhao cha, riasaw a phaoh mâ tâh,” tahpa ta chho ei ta. Zudah chata, “Papua ula, raosaopa ta y mawh sy,” tah ta.

²⁵ Ama puakhei nata Tamari chata, “He hmozy a hneituhpa liana heta na saw ei phaoh,” tahpa ta a parâpa hnohna chata chyhsa tuah ta, ano lilawta, “Ngiachhiepa ta he moh chahnaona zy, khawhri zy, chôhchahrei zy he, ahy eih e a châ, pakhâta ta moh tua,” tah hra ta.

²⁶ Chatawhcha Zudah chata, cha hmozy cha ano eih a châ tahpa vaw pahno ta, “Ano cha, kei hlâta a sia via, ei sawchapawpa Shela cha pahneisa tlôh lei khâh na ta,” tah ta. Zudah chata ano cha hnei khao leipa ta.

²⁷ Chatawhcha saw a zei hai nona chata, a chhi liana chata mahphie vaw y ei ta.

²⁸ Chatawhcha saw â zei hai nona chata pakha chata a ku vaw papua ta, nawhpaytuhpa chata, “He he a pua tua hi,” tahpa ta patu ta, a ku liana chata lari saihpa paky ta.

²⁹ Châhrasala a ku cha a dao heih nona chata a uhnawhpa cha vaw pua haw ta; nawhpaytuhpa chata, “Kheihta e puana na tao tly!” tah ta. Chavâta a moh ta Pereza bi ta.

³⁰ Cha hnôh lâna chata a uhnawhpa a ku liata lari saihpa a pakypa cha vaw pua heih ta, a moh cha Zerah bi ta.