1
Cha hnôh lâ chata chhikao lâta nâ chhi ta, nochhi lâ chhikao liana chata.
2
Chatawhcha Izarel Khazohpa rôhnahna cha nochhi lâ tawhta vaw tlô ta; a pyu cha ti hluhpi pyu hawhta châ ta; alei cha a rôhnahna ta khaih ha ta.
3
Aluahna ei hmôpa a lâna zie cha khihpi parao awpa ta a vypa nata Keba chavah kiah liata aluahna ei hmôpa hawh hra ta châ ta; chatawhcha â khu lâta pao na ta.
4
Nochhi lâ a heihpa chhikao liana chata a o pipa chhôh liata ABEIPA rôhnahna cha a vaw ngia na ta,
5
Thlahpa chata na chalo ta, dôhpachhôh viapa liana chata nâ chhi ta; chatawhcha pachâ tua, ABEIPA rôhnahna chata a o cha pabie khai ha ta.
6
Chyhsa pakha ei kiapâh ta a duah no ta, ahy tlyma bie eina chhopa thei na ta;
7
ei hnohta, “Chyhsa y, he he ei ryureina dyuchhai su, ei pheipazah tlyna, Izarel pathlapazy hry liata chhâzaw ta ei pahrâna awpa su a châ hih. Ei moh pathaihpa cha Izarel chhôhkhazy ta âmo tlyma, ama beizy tlyma ta ama sihryna nata ama beipazy ri pabuna châta hmâpa ta papuapalei khao aw veih ei,
8
ama chhikao cha ei chhikao kiapâh ta taopa ta, ama chhikao tôh cha ei chhikao tôh kiapâh ta sopa ta, keima nata ama likawh ta pâhchhô deita paysapa ta. Ama hmotaopa pasichhihpazy chata ei moh pathaihpa cha papuapalei haw ta, chavâta ei hiehâhna ta âmo cha ei pahleipadia haw.
9
Atahmâ tawhna heta ama sihryna zy, ama beipa ri zy, kei tawhta a hlapi ta soh ei sala, chatawhcha âmo hry liata chhâzaw ta ei pahrâ aw.
10
“Chatawhcha nâ, chyhsa y, a o pipa nohthlahpa cha Izarel chhôhkhazy hnohta pamosa teh, ama hmoparaonazy ama zakheina hâh ta.
11
Chatawhcha ama hmotaopa zydua ama zakhei khiahtala a o pipa yzie zy, a puana zy, a ngiana zy, a yzie tlokhuh, bieraopazy, ryhpa biezy pahnosa la; ama mohmô tlai liata roh teh, ryhpa bie zydua nata bieraopa zydua avaopa ta ama zyh na hâh ta.
12
He he o pipa chata ryhpa bie cha a châ: tlâh laki chô a bypa zydua cha su pathaih chaipa a châ. Pachâ tua, he he o pipa châta ryhpa bie cha a châ na.
13
“Hezy he dy ta maisâh thliena zie a châ, (dy kha cha dy kha nata pazah tie a châ) a patyuna cha dy kha a sâhpa, dy kha a phiapa, a tlâh cha kha kha ta pabyu lymâpa châ ta.
14
Chatawhcha maisâh a sâhna lâ cha he hawhna heta a châ: A lei liata a patyuna tawhta a chhâh a hnei viapa cha dy no châ ta, a kawhna lâ dy kha; a chhâh a chyh viapa tawhta a chhâh lai viapa cha dy palih châ ta, dy kha kawhpa a châ;
15
a maisâh chô a raipa cha dy palih a sâhpa châ heih ta; maisâh chô a raipa tawhna chata ki miapalih a duah ta.
16
Maisâh chô a raipa cha a doh lâ dy hrawhleipalih châ ta, ki palihpa châ ta, a tlâh cha dy khophie a châ, a patyuna cha dy kha padôpa ta a châ. A kiana cha nochhi lâ a heih awpa a châ,” tah ta.
18
Chatawhcha ei hnohta, “Chyhsa y, Abeipa KHAZOHPA chata he tana heta a tah: Ama tao khai tita maisâh hmâna yzie awpa bieraopa cha he hawhna he a châ: Raona hlâna awpazy, thisaih hiena awpazy a châ,
19
Livai chi theihthaipa Zadôka pathla na chakaotuh awpa ta na vaw hnia tyhtuhpa hnohna chata moleina hlâna chata viahchao tôh dawpa na pie awpa a châ, Abeipa KHAZOHPA ta a tah.
20
A thisaih cha la aw chi ta, maisâh ki miapalih nata a chhâh ki palihzy a tlâh padôpa ta paloh aw chi ta; cha hawhna chata maisâh cha pasiepa ta na pathai aw.
21
Moleina hlâna viahchao tôhpa cha la aw chi ta, su pathaihpa khôtho lâta cha chata o ama raopa liana chata rao awpa a châ.
22
Chatawhcha a noh nona liana chata mie tôhpa seina a hnei leipa, moleina hlâna châta hlâ awpa a châ; chatanachata maisâh cha viahchao tôhpa ta ama pathaipa hawhna hra khata pathai awpa a châ.
23
Maisâh pathaihpa cha nama tao khai tita, viahchao tôh dawpa seina a hnei leipa nata mietahkupa tôhpa seina a hnei leipa a zaw hry liatahpa na hlâ aw.
24
ABEIPA hmiakô liata hlâ aw chi ta, theihthaipa chata alôh mia aw ta, ABEIPA o lâta raona hlâna châta a hlâ aw.
25
Noh sari chhôh cha noh chareih ta moleina hlâna châta mie na hmâh awpa a châ; viahchao tôh dawpa nata mietahkupa tôhpa mietahkupa zaw hry liatahpa, seina a hnei leipa, ama hmâh hra awpa a châ.
26
Maisâh pathaina nata pasi pathaina châta noh sari chhôh châ aw ta; chatanachata maisâh cha pathaisapa a châ ha aw.
27
Chatawhcha cha nohzy cha ama tlotla khai tawhna chata, a noh charie noh tawhta theihthaipazy ta nama raona hlânazy nata nama dyna hlânazy, maisâh liata hlâ aw ei ta; chatawhcha ei châ vaw pyh aw ei, Abeipa KHAZOHPA ta a tah,” tah ta.
