1
Eima seichâna kô syno nata kô pangawhna, cha kô a thaona thla, noh hrawhna, khihpi rao tawhta kô hrawhleipalihna, cha noh tlai liana chata ABEIPA ku cha ei chô liata vaw y ta, cha liana chata nâ chhi ta,
2
Khazohpa aluahna liana chata Izarel râh liata na chhihtha ta, tlâh sâh ngaitapa liata na soh ta, cha chhôh lâna chata khihpi padua chiehpa hawhna tlaita y ta.
3
Cha lâna chata nâ chhi ta, chyhsa pakha vaw y ta, a hmia alânazie cha dawh hawh tlaita châ ta, lari nata thliena chôhchahrei chaba ta; chhikao liana chata a duah ta.
4
Chatawhcha chyhsa chata ei hnohta, “Chyhsa y, namo ta moh la, na nah pachôh la, ei cha pamosa awpa lâta na palôhrupa khâchâ pahnie teh, cha hmo ei cha pamosa awpa châna chata he liana heta a vaw chhipa châ tlôh chi ta; na hmôpa zydua cha Izarel chhôhkhazy hnohta phuah mah y,” tah ta.
5
Chatawhcha o chheipâh liana chata kuh pâhchhô vaw y ta, chyhsa chata thliena chôhchahrei dy charu a seihpa chaba ta, a dy kha cha dy kha nata pazah tie chyu a châ; kuh pâhchhô chhâna lâ cha thlie ta a chôhchahrei do kha châ ta, a sâhna lâ chhao chôhchahrei do kha a châ hra.
6
Chatanachata nochhi lâta chha chhikao o lâta a vy ta, hleidy liana khata kiah ta, chhikao o angiana châkeih chhôhpadâhpa cha thlie ta, chôhchahrei do kha ta kawh ta, chhikao angiana chhôhpadâhpa hropa cha chôhchahrei do kha kawh hra ta;
7
vaina chhôhpadâhpazy cha a doh lâ chôhchahrei do kha, a hâ lâ chôhchahrei do kha chyu a châ; vaina chhôhpadâhpa likawh cha dy pangawh chyu châ ta; o pipa lâ chhikao o aikah lâta chhikao angiana chhôhpadâhpa cha chôhchahrei do kha châ ta.
8
pipa lâ chhikao chhao cha thlie ta, chôhchahrei do kha a châ;
9
chhikao aikah cha thlie ta, dy charie a châ, a pâhchhô chatipazy cha dy no chyu châ ta, chhikao aikah cha o pipa chhâh a châ.
10
Chatawhcha nochhi lâchhâh chhikao vaina chhôhpadâhpazy cha hiakha lâ hiakha lâta miathôh rairieh châ ta; ama miathôh chata a khopa sai a châ; pâhchhô chatipazy chhao kha hiakha nata hiakha lâ tahpa cha a kho sai.
11
Chatawhcha chhikao a ngiana hâ lâ cha thlie ta, dy hrawh a châ; chhikao o a doh lâ cha dy hrawhleithôh a châ.
12
Vaina chhôhpadâhpa hmiakô liata chhôhpadâh hiakha lâ hiakha lâta dy kha a chhâhpa rairieh ta y ta, chatanachata chhôhpadâhpazy cha hiakha lâ hiakha lâta a dy charu rairieh châ ta.
13
Chatawhcha chhikao o cha thlie ta, vaina chhôhpadâhpa miakha chô tawhta hiakha lâ chô taihta dy kih nata dy pangawh a kawh; ochhi nata ochhi a pazao chyupa ta.
14
Aikah chhao cha thlie ta, dy syno châ ta; chhikao o aikah khôtho lâ cha dôhpachhôh vaw châ ta. "15 Chhikao o khôtho chaipa tawhta chhikao o aikah chhôh chaipa taihna chata dy sypangawh a châ."
16
Chatawhcha chhikao chhôh lâna chata a chheipâh ta chhôhpadâhpazy liana chata opy pahy thei leipa y ta, a likawh liata a tôhzy liata chhao, a aikahzy liata chhao, a chhôh lâta chhao a chheipâh ta opy y ta, a tôhzy liana chata thiahra kô nohthlahpa y chyu hra ta.
17
Chatawhcha dôhpachhôh khôtho lâtahpa liana chata nâ chhi ta; chhôhpadâhpazy y ta, dôhpachhôh cha a chheipâh ta lâpi y ta; lâpi lâna chata chhôhpadâhpa sythôh y ta.
18
Chatawhcha lâpi cha chhikao o tawhta paraipa châ ta, chhikao o tluta a châ awpa ta paraipa châ ta; cha cha lâpi a hnai viapa a châ.
19
Chatanachata chhikao o a hnai viapa dady dôhpachhôh a chho lâ viatahpa taihna chata thlie ta, a kawhzie cha dy za kha a châ, a nochhi lâ nata a maw lâ chhao.
20
Chatawhcha maw lâta nâ chhi heih ta, dôhpachhôh khôtho lâtahpa chhikao o maw lâchhâh tahpa a heihpa y ta. A doh nata a hâ chhao thlie ta.
21
Vaina chhôhpadâhpazy cha hiakha lâ hiakha lâta miathôh rairieh y ta, a pâhchhô chatipazy nata a chhikao aikahzy chhao hmiatuapa hawh sai ta a châ; a doh cha dy sypangawh châ ta, a hâ cha dy kih nata dy pangawh a châ.
22
A opyzy, a aikahzy liata thiahra kô nohthlahpazy cha nochhi lâ chhikao o liatahpa hawhta sai a châ; hleidy chhâh sari ta kaw y ta; a aikah cha a chhôh lâta y ta.
23
Dôhpachhôh lâ viapa a ngiana chhikao o cha chhikao o hropa dady liana khata y lymâ ta, maw lâ nata nochhi lâta chhao, chatawhcha chhikao o nata chhikao o likawh cha thlie ta dy za kha a châ.
24
Chatawhcha chho lâta nâ chhi heih ta, chho lâ chhikao o cha vâro y ta, a thliena zie ualuapa ta a pâhchhô chatipazy nata a aikah cha thlie ta.
25
Cha liana chata opy hropazy hawh hra ta a chheipâh ta opyzy y ta, a aikah chhao; a doh cha dy sypangawh châ ta, a hâ cha dy syno nata dy pangawh a châ.
26
Chatawhcha kiana awpa ta hleidy chhâh sari y ta, aikah cha a chhôh lâta y ta; hiakha lâ hiakha lâta pâhchhô heisâ lâ miakha, haosâ lâ miakha chatipazy liata thiahra kô nohthlahpa y lymâ ta.
27
Chatawhcha chho lâna chata dôhpachhôh viapa a ngiana chhikao o y ta; chho lâ chhikao ozy likawh cha thlie ta, dy za kha a châ.
28
Chatawhcha chho lâ chhikao o liana chata dôhpachhôh viapa liata nâ chhi ta; thliena ualuapa ta chho lâ chhikao o cha thlie ta.
29
A vaina chhôhpadâhpazy, a pâhchhô chatipazy, aikahzy cha thliena ualuapa sai ta; cha liana chata opyzy y ta, a aikah liata chhao a chheipâh ta; a doh lâ dy sypangawh châ ta, a hâ lâ dy syno nata dy pangawh a châ.
30
Chatawhcha a chheipâh chata aikahzy y ta, a doh lâ syno nata dy pangawh, a hâ lâ dy pangawh a châ.
31
A aikahzy chata dôhpachhôh khôtho viapa lâ a heih ta, a pâhchhô chatipazy liana chata thiahra kôzy nohthlahpa y ta, a kiana cha hleidy chhâh charie hnei ta.
32
Chatawhcha nochhi lâna khata dôhpachhôh viapa lâ nâ chhi ta; thliena ualuapa ta chhikao cha thlie ta.
33
A vaina chhôhpadâhpazy, a pâhchhô chatipazy, a aikahzy, thliena ualuapa sai ta, cha liana chata opyzy y ta, aikah liata chhao a chheipâh ta, a doh lâ cha dy sypangawh châ ta, a hâ lâ cha dy syno nata dy pangawh a châ.
34
Aikahzy chata dôhpachhôh khôtho viapa lâ a heih ta, a pâhchhô chatipazy liana chata hiakha lâ hiakha lâta thiahra kôzy nohthlahpa y ta; a kiana hleidy chata chhâh charie hnei ta.
35
Chatawhcha maw lâ chhikao o liana chata nâ chhi heih ta; a thliena ualuapa ta thlie ta.
36
A vaina chhôhpadâhpazy, a pâhchhô chatipazy, a aikahzy, cha liana chata a chheipâh ta opyzy y ta; a doh lâ dy sypangawh châ ta, a hâ lâ dy syno nata dy pangawh a châ.
37
A pâhchhô chatipazy cha dôhpachhô khôtho viapa lâta y ta, a pâhchhô chatipazy liana chata hiakha hiakha lâ thiahra kôzy nohthlahpa y ta; a kiana hleidy chata chhâh charie hnei ta.
38
Chhikao o aikah tawhta a ngia theipa ta chhôhpadâhpa y ta, cha liana chata raona hlâna awpa pasie tyh ei ta.
39
Chhikao o aikah hiakha hiakha lâ liana chata tlâhkhai miano rairieh y ta, cha liana chata raona hlânazy, moleina hlânazy thai leina vâta hmohlâpazy thiena awpa a châ.
40
Maw lâ chhikao a kiana khôtho lâ a kâ lâ miakha liana chata tlâhkhai miano y ta; chhikao o aikah hiakha lâna chhao chata tlâhkhai miano y hra ta.
41
Chhikao o kâ lâ hiakha lâna chata tlâhkhai miapalih y hra ta, atheihna thiena tyhpa cha tlâhkhai miacharie châ ta.
42
Chatawhcha raona hlâna châta tlâhkhai miapalih alô khaipa ta taopa, a doh lâ dy kha nata khophie, a hâ lâ dy kha nata khophie, a sâhna lâ dy kha châ ta, cha liana chata raona hlâna nata atheihna thiena awpa chhaichhizy cha soh tyh ei ta.
43
Chatawhcha a chhôh lâna chata a chheipâh ta a kopa pazah tie a seihpa patao ei ta. Tlâhkhaizy chô liana chata hmohlâpa sa y ta.
44
Chatawhcha dôhpachhôh viapa liata nâ chhi ta, dôhpachhôh viapa liana chata chhôhpadâhpa miano y ta, miakha cha maw lâ chhikao o thaby liata chho lâ aheihpa ta y ta, miakha cha chho lâ chhikao o thaby liata maw lâ aheihpa ta y ta.
45
Chatawhcha ano chata ei hnohta, “He chhôhpadâhpa chho lâ a heihpa he, a o avaotuhpa theihthaipazy yna châ ta,
46
chhôhpadâhpa maw lâ a heihpa cha maisâh a vaotuhpa theihthaipazy yna a châ; hezy he Zadôka sawchapawzy Livai sawchapawpazy hry liata a chakao awpa ta ABEIPA a vaw hnia tyhtuhpazy ama châ,” tah ta.
47
Chatawhcha dôhpachhôh cha thlie ta, a doh lâ dy za kha, a hâ lâ dy za kha, a ki palihpa a châ; chatawhcha maisâh cha tlyhmia liana chata y ta.
48
Chatawhcha a o pipa aikah liana chata nâ chhi ta, aikah pâhchhô chatipazy cha thlie chyu ta, a hiakha lâ hiakha lâta dy pangawh a chhapa rairieh châ ta; a ngiana cha dy hrawhleipalih a kawhpa a châ; a kâ lâta chhikao pâhchhô chatipazy cha dy thôh rairieh a châ.
49
A aikah cha a doh lâ dy syno a châ, a hâ lâ dy hrawhleino a châ; a kiana hleidy châta chhâ hrawh y ta; pâhchhô chatipa thaby liana chata hiakha lâ hiakha lâta a tôh laipa y ta.
