1
Kô hrawhleikhana, thla liata noh hmiatua chaipa liana chata ABEIPA bie cha ei hnohta vaw tlô ta:
2
“Chyhsa y. Tyre chata Zerusale kyh liata, ‘Azi, phopizy ochhi a rao haw, kei lâta a pahy ta; a vaw rao khai hawpa vâta kei tao pathipa ta ei y aw,’ a tahpa vâta.
3
Abeipa KHAZOHPA chata he tana heta a tah: Hy Tyre y, ei châ dyuh, tilaipi ta a chalâparâpa a thy pathlapa hawh tlaita, na chôta a vy awpa ta pho hluhpizy ei tuah aw.
4
Tyre kuhzy cha parao aw ei ta, o sâhpazy cha ama pacho aw; âmo tawhtapa alei zydua hao pasia aw na ta, lôpanô chawhkaraipa hawh tlaita ei tao aw.
5
Tilaipi liata sao zawna su a châ aw; kei ta rei haw tlôh na ta, Abeipa KHAZOHPA ta a tah; chatanachata phopizy châta hraona a châ aw;
6
a sawchanô râh liata a ypazy cha zaozi ta thiepa châ aw ei ta. Chatanachata ABEIPA cha ei châ tahpa ama pahno aw.
7
“Abeipa KHAZOHPA chata he tana heta tah tlôh ta: Tyre chô liana chata Babylaw beipa Nebukareza, abeizy beipa cha maw lâ tawhta arâzy chhaota nata talailizy nata arâ chô a kiahpa chyhsazy, a py nata zawpi hluhpi ei vaw chhi aw.
8
Na sawchanôzy râh liata zaozi ta a thie aw; nama pakhâna chata kuh a tao aw, namâ dyuhna chata tlâh byupazy a tao aw, nâ lâta chhôhkhana a hmâh aw.
9
Na kuh parao nawpa ta kuh paraona a tao aw, na o sâhpa ahrei ta a pacho aw.
10
A arâ hluhpa vâta buhchado ta a cha khu aw; khihpi raopa liata chyhsazy amâ ngia tyhpa hawhta na chhikao amâ vaw ngia hra tina chata na kuh a chalyu aw, arâ a kiahpazy pyu nata adyuhna talaili pyu ta.
11
Na othliahzy arâ phei ta a parao aw; na chyhsazy zaozi ta a thie khai aw; na thatlôna to a sâhpazy alei taihta a cho aw.
12
Na ryu hmo hraona ta ama la aw, na hmobao zydua ama hrao khai aw; na kuh pâhchhô ama pacho aw, na o phapa ama parao khai aw; na alô zy, tho zy, buhchado chhao ti zy liah liata ama thy aw.
13
Chatawhcha na hla sana pyuzy ei chalihsa khai aw, na totâ pyuzy chhao a dia pathla aw.
14
Alôpanô chawhkaraipa ta ei cha tao aw; sao zawna ta na vaw châ aw; sapa châ khao aw va chi; keima ABEIPA heta reih haw tlôh na ta, Abeipa KHAZOHPA ta a tah.
15
“Abeipa KHAZOHPA chata Tyre hnohta he tana heta reih ta: Na chhôh liana chata a thiena zy a y tita, hmah phaohpazy amâ rôh tina chata, na paona pyu chata tilaipi kiah râhzy a chalyu aw vei ma? "16 Tilaipi chô liata abeisaw zydua cha ama ryureina dyuchhai tawhta chô aw ei ta, ama poh rôhnahpazy soh aw ei ta, ama chysia a ngiapazy ama pahluh ha aw; achalyuna ta tlao a tobi aw ei ta; a chalyu ngâ kaw aw ei ta, noâh ama cha tah aw."
17
Chatawhcha nâma cha chaphôtuna cha phi aw ei ta, na hnohta, ‘Khihpi moh pathâhpa, tilaipi chô liata thatlôna, ti a thaipa chyhsazy saita pahrâ tyhna cha, ano nata a chhôh liata a pahrâpa zydua, chyhsa a khiekhâpazy ta ama cha chi tyh thlâ bao nata na raona cha a rarôh-y kaw dia’
18
Na paona noh liata, liahpahlôzy amâ chalyu; chatatlyh, na lei noh liata tilaipi liahpahlôzy tymâpa ta ama y aw,’ ama tah aw, tahpa ta.
19
‘Abeipa KHAZOHPA chata he tana heta tah tlôh ta: Khihpi roryhrapa ahy hmah pahrâ leipa khihpi hawhta ei cha tao tina chata, ti a thu ngaitapa liata cha pamôh aw na ta, ti hluh ngaitapa ta a cha vao aw,
20
hlâno chyhsa khaotlô liata a sie hawpazy hnohta, cha za tuah aw na ta, alei ry lâta eikhano ta roryh a hra hawpa khaotlô thuhpa liata a sie hawpa zy hnohta cha pahrâsa aw na ta, ahy hmah ta ama cha pahra lei nawpa nata a hropazy hryta rôhnahna na hmô khao chachei lei nawpa ta.
21
Cha pahleipadia syulyu ha aw na ta, y khao aw va chi; chyhsa ta cha tlua hra ei sala, cha hmô chacheita aw veih ei, Abeipa KHAZOHPA ta a tah,” tah ta.
