Puasaina 6

¹ ABEIPA chata Mawsi hnohta, “Atahmâ la Phirao chô liata ei taonazie awpa cha na hmô ha aw; ku thatlô ngaitapa ta âmo papua aw ta, chatawhcha ku thatlô ngaitapa ta a râh tawhtapa cha âmo a to aw,” tah ta."

² Khazohpa ta Mawsi bie a chho ta, a hnohta, “Kei ABEIPA ei châ,

³ Abaraha hnohta zy, Aisika hnohta zy nata Zakaw hnohna khata, Khazohpa Atotaotheipa ta a vaw luah na ta, ei moh ZEHÔVA ta deikua chata ama hnohta a pahnosa leipa na ta.

⁴ Âmo hnohna chata, Kana râh ama khichhai châna râh bohpi leipa ta ama vaw y hawpa kha, pie a chhuahpa ta ei bietai cha pa-i haw hra na ta.

⁵ Izarel pathla zy Izi hyutuhpazy ta ama seizy a rôhpa kha vaw pahno hra na ta, ei biehrai cha ei thei thlâ haw.

⁶ Chavâta Izarel pathlazy hnohna chata, “Kei ABEIPA châ na ta, Izi sahlaozy phaohripa tawhtapa he cha papua aw ei na ta, ama sei ta nama ypa he ei cha papuasa aw ei, pachiana rarôh y ngaitapa ta, bâh pazawhpa tlaita ei cha chatlai aw ei,

⁷ chatawhcha ei chyhsa châta cha hnei aw ei na ta, kei, nâmo châta Khazohpa châ aw na ta, chatanachata kei he ABEIPA nama Khazohpa, Izi sahlao phaohripa tawhtapa cha papuatuhpa ei châ tahpa pahno aw eichi ta.

⁸ Abaraha zy, Aisika zy nata Zakaw zy hnohta ei bâh tlai ta, pie ei chhuahna râh liata cha chhitha aw ei na ta; chatanachata nama ryuto ta ei cha pie aw ei. Kei ABEIPA ei châ hih,’ tahpa ta chho mah y,” tah ta.

⁹ Mawsi ta Izarel pathlazy hnohna chata biezy cha reih ta; châhrasala palôhrupa thazeina vâta nata thata riepatheina vâna chata, Mawsi bie cha nahthlie khoh leipa ei ta.

¹⁰ Chatawhcha ABEIPA chata Mawsi hnohta,

¹¹ “Sie la, Izi beipa Phirao hnohta, Izarel pathlazy he a râh tawhta papua sa awpa ta va reih teh,” tah ta.

¹² Mawsi chata ABEIPA hmiakô liata, “Izarel pathlazy ta ei bie reipa nahthlie khoh tlôh lei khâh ei ta; kei kachôhleiâpa bie reipa he, Phirao ta kheihta e a nahthlie aw,” tahpa ta reih ta.

¹³ ABEIPA chata Mawsi nata Arawna cha bie a chho ta, chatawhcha Izarel pathlazy hnohta nata Izi beipa Phirao hnohna chata, Izi râh tawhta Izarel pathlazy papua awpa ta bie pie ta.

¹⁴ Hezy he ama pawzy pho thaby chaipazy cha ama châ: Izarel saw tuapa Rubena sawchapawpazy cha :Hanôka zy, Pala zy, Hezraw zy, Kami zy châ ei ta; hezy he Rubena chhôhkha sawzy ama châ.

¹⁵ Simeôna sawchapawpazy cha : Zemuel zy, Zamina zy, Ôha zy, Zakhina zy, Zôha zy, Kana chanô liata a sawchapawpa Shaul zy ama châ; hezy he Simeôna chhôhkha sawzy cha ama châ.

¹⁶ Hezy he ama pathlazy lymâ hawhta Livai sawchapawpazy moh cha a châ: Kesao zy, Kôha zy, Merari châ ei ta, chatawhcha Livai hro chhôh kô cha, kô za kha nata kosythôh nata kô sari a châ.

¹⁷ Kesao sawchapawpazy cha : Libani nata Shimei zy ama chhôhkha sawzy lymâ hawhta ama châ.

¹⁸ Kôha sawchapawpazy cha : Amrama zy, Izha zy, Hebraw zy, Uziel zy châ ei ta, Kô ha hro chhôh cha kô za kha nata kô sythôh nata kô thôh a châ.

¹⁹ Merari sawchapawpazy cha : Mahli nata Musi ama châ. Hezy he ama chhôhkha sawzy lymâ hawhta, Livai phozy cha ama châ.

²⁰ Amrama chata a paw sietanô Zôkebe lahpinô ta hnei ta, chatawhcha Arawna nata Mawsi sapa ta, Amrama hro chhôh cha kô za kha nata kô sythôh nata kô sari a châ.

²¹ Izha sawchapawpazy cha Kôra zy, Nephe zy, Zikri zy ama châ.

²² Uziel sawchapawpazy cha :Misael zy, Elzapha zy, Zithari zy ama châ.

²³ Arawna chata Aminada sawchanônô Nashôna sietanô Elishebe cha lahpinô ta hnei ta; chatawhcha Nada zy, Abihu zy, Eliaza zy, Ithama zy sapa ta.

²⁴ kôra sawchapawpazy cha : Asira zy, Elkanah zy, Abiasa zy ama châ; hezy he Kôra sahlao chhôhkha sawzy cha ama châ.

²⁵ Arawna sawchapawpa Eliaza chata Putiel sawchanôzy hry liatahpa pakha cha lahpinô ta hnei ta; chatawhcha Phineha sapa ta. Hezy he ama chhôhkha lymâ hawhta Livai pathla thaby chaipazy cha ama châ.

²⁶ Cha Arawna nata Mawsi zy cha ABEIPA ta : “Izi râh tawhtapa Izarel pathlazy he ama py sahlao lymâ hawhta chhitha teh u,” tahpa ta a chho.

²⁷ Cha chyhsazy cha Izi beipa Phirao cha bie a chhopa ta, Izarel pathlazy cha Izi râh tawhta papua awpa ta a chhotuhpazy cha, Mawsi nata Arawna he ama châ.

²⁸ Izi râh liata ABEIPA ta Mawsi bie a chho nona chata,

²⁹ ABEIPA chata Mawsi hnohta, “Kei ABEIPA cha ei châ; Izi râh beipa Phirao hnohna chata na hnohta ei reipa zydua he reih teh,” tahpa ta chho ta.

³⁰ Châhrasala Mawsi ta ABEIPA hmiakô liata, “Kei kachôleiâpa châ tlôh na ta; kei bie reipa he phirao ta kheihta e a nahthlie aw?” tah ta.