1
ABEIPA ta Mawi hnohta, “Phirao chô liata nata Izi chô liana heta, ei kha cha potlana ei patlôsa heih aw; cha tawhta la cha papua ha awh ei; a cha papua daidao ei ta la, he tawhtapa he pua syulyu muh vy.
2
Zawpizy nahkhao liata bie kei reih teh, chapaw tota ama vaihzy nata chanô tota ama vaihzy cha tâkâ ri a tobina nata ngôh a tobinazy cha hiah mawh sy,” tah ta.
3
ABEIPA ta chyhsazy cha Izi mozy pangiachhiesa ta. Cha dei châ leipa ta, Mawsi cha Izi râh liana chata Phirao chkaotuhpa sahlao pachânazie liata nata zawpizy pachânazie liana chata chyhsa rôhnah ngaitapa châ ta.
4
Mawsi chata, “ABEIPA ta he tana heta a tah; zâ cho chhôh rachhôh ta Izi chhôh liana heta vaw chahryh aw na ta,
5
Izi râh liata saw tuapa zydua abei dyuchhai liata a tyuhpa Phirao, saw tuapa tawhta sâh chariehna thaby liata a ypa, seichanô saw tuapa taih chhaota ama thi aw; sahroh a pih tuapa zydua chhaota.
6
Izi râh chhôh zydua liana chata chana ru ngaitapa y aw ta, cha hawhta a rupa rai y beih leipa ta, cha hawhpa rai cha y heih khao hra aw vei.
7
Châhrasala Izarel pathla sahlao zydua, chyhsa nata sa lâta rai, i chhaota nga aw vei; ABEIPA chata Izi mozy nata Izarel mozy he a panano tlai tahpa nama pahno aw.
8
Chatawhcha he cha chakaotuhpa zydua he, ei hnohta vaw pua aw ei ta, ‘Pua teh, châ zituhpa zydua chhao heta,’ tahpa ta, ei hmiakô liata amâ bôh aw. Chatawhcha cha hnôh lâna chata ei pua aw,” tahpa ta tah ta. Chatawhcha Phirao tawhtapa cha hiehâh ngaitapa ta pua haw ta.
9
ABEIPA ta Mawsi hnohta, “Phirao ta nama bie a pyh aw vei; ei hmo tao noâhpazy Izi râh liana heta papôhsapa ta a y thei nawpa ta,” tah ta.
10
Mawsi nata Arawna chata Phirao hmiakô liana chata, cha hmonoâhpa zydua cha tao ei ta; chatawhcha ABEIPA ta Phirao pathipalôh cha kuh pachhasa ta, chatanachata Izarel pathlazy cha a râh tawhtapa papua pasaih leipa ta.
