1
Kô sari chhâna maihta ngiahthaina nama tao awpa a châ.
2
Ngiahthaina ryhpa cha he hawhna he a châ; dyupacheisatuhpa maih ta, ama vaihzy, dyu vaw chei hawpa cha amâ ngiahthai awpa a châ, a vaih mo chhao, a unawhpa chhao, a hiah awpa châ vei, ABEIPA ngiahthaina cha phuahpa a châ hawpa vâta.
3
Pho hropa cha hiah thei aw eichi ta; anodeikuacha nâmo eih kheihawhpa rai nama unawhpazy vaw hmâpa cha namâ ngiahthai awpa a châ.
4
He biepiepa atahmâ bie ei cha piepa zydua he a pyhpa ta, ABEIPA nama Khazohpa ao cha phahnai khoh ngaitapa ta nama zyh khiahta cha.
5
dyhchhiepa rai y chachei leipa aw eichi ta. ABEIPA nama Khazohpa ta ryutona hnei nawpa ta a cha piepa ei, râh liana chata ABEIPA ta byhnâ a cha pie thlyu aw ei.
6
ABEIPA nama Khazohpa chata a cha taihpa haw ei ta byhnâ cha pie aw ta, pho hluhpi dyu pacheisa aw eichi ta, nâmo deikua chata chei aw vei eichi, pho hluhpi chô liata ryu reih aw eichi ta, nama chô liata deikuacha ryu reih hra aw veih ei.
7
ABEIPA ta râh a cha piepa, nama yna liata nama unawhpazy hry liata dyhchhiepa ama y khiahtala, nama unawhpa dyhchhiepazy liana chata nama palôhrupa pachyu leipa ula, ria-y hra khah u,
8
âmo liana chata hmo nama pie thlyu awpa a châ, amâ phahlana liata ama byuhpa phiehruh awpa ta nama pacheisa awpa a châ.
9
‘Ngiahthaina kô, kô sarina cha vaw tlô daihmâ ta,’ tahpa ta, nama unawhpa dyhchhiepazy cha mopakhôpa ta, khâpahmah pie khoh leipa ta, nama pathipalôh liata a su lei ngaitapa ta pachâna y leipa ta a chado teh u, chata leipa ta la ano chata nama chô kyh liata ABEIPA aw aw ta, nama châta moleina a vaw châ pathlei aw na.
10
Nama pie thlyu awpa châ ta, chatawhcha nama pie tita chhao nama pathipalôh liata pasai leina nama hnei chachei awpa châ vei; cha hawhpa hmo vâta ABEIPA nama Khazohpa ta nama hmotaopa zydua liata nata nama ku hria zydua liata byhnâ a cha awpa aw ei.
11
Cha râh liana chata dyhchhiepazy y lei no y beih tlôh leipa aw ta; chavâta nama râh liata nama unawhpazy chô liata a phahlapa chô liata zy, nama dyhchhiepa chô liata zy, nama pie thlyu awpa a châ, tahpa ta bie ei cha pie ei.
12
“Nama unawhpa Hebrai chapaw tlyma, Hebrai chanô tlyma, nâmo liata zuapa ta kô charu a cha chakao khiahtala, kô sari kô liana chata khotalaipa ta a y awpa ta nama papua awpa a châ.
13
Chatawhcha khotalaipa ta a y awpa ta nama papua awpa tina chata ku ruapa ta nama papuasa awpa châ vei;
14
nama mietahkupa zaw liatahpa zy, nama sawhri liatahpa zy, nama kresawti saohpa liatahpa zy, mochhih leipa ta nama pie awpa a châ; ABEIPA nama Khazohpa ta byhnâ a châ awpazie lymâ hawhta nama pie awpa a châ.
15
Izi râh liana khata sei vaw châ haw eichi ta, ABEIPA nama Khazohpa ta a cha chatlai ei tahpa kha nama pahno thlâh ha awpa a châ; cha vâna chata atahmâ he, he biezy he ei cha pie ei.
16
Chatawhcha nâmo nata nama chhôhkha ama cha pasai leina vâta namâ dyhryhpa vâta nama hnohta, ‘Cha puasai aw veih ei na,’ ama tah khiahtala,
17
thua pazaopa la aw eichi ta, ochhi pachhaipa ta a nah vieh aw eichi ta, chatanachata chhâzaw ta nama sei ama châ aw. Chatawhcha nama seichanô chhao cha hawhna hra chata nama tao awpa a châ.
18
Khotalaipa ta y awpa ta papuapa cha hmo ru kawpa ta nama pachâ awpa châ vei; a hlaopa hriapa lie no ta hriapa ta kô charu cha chakao ha tlôh ta. Chatawhcha ABEIPA nama Khazohpa ta nama hmotaopa maih liata byhnâ a cha pie lymâ ei
19
Nama sahroh zawzy, nama mietahkupa zawzy hry liata a chapawpa a patawh tuapa maih zy cha ABEIPA nama Khazohpa châta nama pie awpa a châ; nama viahchao a patawh tua chaipa cha rai hriapa ta nama hmâh awpa châ leipa ta, nama mietahkupa zawzy hry liata a patawh tua chaipa hmi cha nama ngyu awpa châ vei.
20
ABEIPA nama Khazohpa hmiakô liata kô tato ta ABEIPA ta su a rao awpa liana chata nama nie awpa a châ, nâmo nata nama chhôhkha chhaota.
21
Seina a hneipa, a pheisypa tlyma, a mo a chaopa tlyma, seina a hneipa rai cha ABEIPA nama Khazohpa lâta a theih nawpa ta nama hmâh awpa châ vei.
22
Nâmo yna su liata nama nie awpa a châ; pathaih leipazy nata pathaihpazy chhaota, he sasu zy, sakhih zy hawhpa he cha ama nie thei aw.
23
A thisaih deikua cha nama nie awpa châ vei; ti hawhta alei liata nama patlai awpa a châ.
