Daniel 4

¹ Abei Nebukaneza chata chyhsa tozy, pho tozy, rei to zydua, aleilô zydua liata a pahrâpazy hnohna chata: Nama chô liata adyhna papôhsapa ta y mawh sy!

² Chônôchai Khazohpa ta ei hnohta hmo pamosanazy, hmonoâhpazy, a tao hawpa he palâsapa a pha ei tah na.

³ A hmo pamosanazy cha rôhnah ta, a hmotao noâhpazy cha thata a châ kaw dia! A khihnarâh cha khihnarâh hlôpa châ ta; a ryureina cha chhâ y chhôh zydua a châ aw.

⁴ Kei, Nebukaneza he ei o liata phasa ngaitapa nata ei o rôhnahpa liata hneirôh ngaitapa ta y na ta.

⁵ Mâsana ei chi ngaitapa sa na ta; ei rakhô liata ei pachâpadyna nata ei luh liata aluahna chata na patypamâ ta.

⁶ Chavâta Babylaw chyhsa sopa zydua cha ei mâsapa chhopasiana eina pahnosa thei nawpa ta ei hmiakô liata a vaw chhi awpa ta biepie na ta.

⁷ Chatanachata molie thaipazy, awhsi kyh a thaipa zy, Kaldia mo zy, chhochhieliena kyh a hmâhpazy cha a vy ei ta; ei mâsapa cha chho na ta, châhrasala a chhopasiana rai cha na pahnosa leipa ei ta.

⁸ A chhâ chaina liata Daniel, ei khazohpa moh hawhpa a phaohpa, a moh Beltesaza, ano liata khazoh pathaihpazy thlahpa a ypa cha ei hmiakô liata a vy ta: chatawhcha ei mâsapa cha chho na ta,

⁹ “Hy Beltesaza y, molie thaipazy hyutuhpa y, nâma liana chata khazoh pathaihpazy thlahpa a y tahpa nata bie nyupa rai ta cha patypamâ vei tahpa ei pahnopa vâta, ei mâ lâta ei hmôpa aluahna nata a chhopasiana cha na chho tua.

¹⁰ Ei rakhô liata ei luh liata aluahnazy cha he hawhna heta a châ: Mohmia pasaih na ta, alei liah liah liata tho vaw y ta; a sâhnazie cha thata châ ta.

¹¹ Tho cha laiseih ta, a lai pha ta, a sâhna lâta avâ daih ta, kaokih tawhta a lâ thei khai ta.

¹² A hnazy cha a ngia ta, a theizy hluh ta, ano liana chata hro hneipa zydua chata niepa y ta. Lyurâhpa sazy chata a nodina a chhai ei ta, avâ liata a zawpa pavawzy cha a chiahzy liata pahrâ ei ta, sapa a phaohpa zydua cha ano pasapa ama châ.

¹³ “Ei rakhô liata ei zia thlâh no ta, ei luh liata aluahna hmô na ta, avâ tawhta vaihtuhpa mo pathaihpa za chô ta.

¹⁴ A paro ngaitapa ta, ‘Tho cha thlu la, a chiahzy cha pathai la, a hnazy chatho pathlah la, a theizy papai pathlah teh; a ry tawhtapa lyurâhpa sazy cha pai ei sala, a chiah tawhtapa pavawzy chhao a zaw pai ei se.

¹⁵ Anodeikuacha lyurâhpa sibiepa a pyupa hry liata alei liata a thabiapa cha thua nata daw ta chahrypa ta, pahlô la. Avâ diati ta dâ sala; a tovyuh awpa cha lyurâhpa sazy nata sibiepa hry liata ypa châ se;

¹⁶ a palôhrupa cha chyhsa palôhrupa tawhta pananopa châ sala, a hnohta lyurâhpa sa palôhrupa piepa châ mawh sy; a chô liata daihti miasari lei mawh sy.

¹⁷ Bie pathlapa he vaihtuhpazy biepiepa ta taopa châ ta, hmo a hnawpa he mo pathaihpazy bie ta taopa châ ta. Chônôchaipa chata chyhsazy abeina khihnarâh chô liata bie hnei ta, a khokheipa maih pie ta, chyhsa nawh chaipazy chhao a pahrâsa tyh tahpa chyhsa ta ama pahno nawpa ta a châ,’ tahpa ta aw ta.

¹⁸ He mâ he kei, Abei Nebukaneza ta sa na ta, nâ, hy Beltesaza y, a chhopasiana cha phuah teh. Ei khihnarâh liata chyhsa sopa zydua chata a chhopasiana cha na pahnosa thei tlôh lei khâh ei ta; nâ deikua chata na pahnosa thei na, nâma liana chata khazoh pathaihpazy thlahpa cha y tlôh ta,” tahpa ta.

¹⁹ Daniel, a moh Beltesaza cha no-umâpa ta y chy ta, a pachâpazy chata patypamâ ta. Abei chata a hnohta, “Beltesaza y, mâsapa tlyma, a chhopasiana tlyma chhaota cha patypamâ khah se,” tahpa ta reih ta. Beltesaza chata a hnohta, ‘’Ei beipa y, mâsapa cha, châ haotuhpa châta châ sala, a chhopasiana chhao cha na khakhaipazy châta châ mawh sy.

²⁰ Tho na hmôpa vaw laiseihpa ta, a lai phapa ta, avâ daihpa ta, kaoki tawhta a lâ thei khaipa nata a ry liata lyurâhpa sazy pahrâpa ta, a chiahzy liata avâ liata pavaw a zawpazy pahrâna a vaw châpa cha,

²² hy beichaipa y, nâma châ chi ta; laiseih chi ta, na tha tlô ta, na rôhnahna cha laiseih ta, avâ daih ta, na ryureina cha kaoki taihta châ tlôh ta.

²³ Avâ tawhta vaihtuhpa mo pathaihpa za chôpa ta, ‘Tho cha thlu la, pahleipadia teh; anodeikuacha lyurâhpa sibiepa a pyuhpazy hry liata, alei liata a thabiapa cha thua nata dawh ta chahrypa ta pahlô la; avâ diati ta padâ sala, a to awpa cha lyurâhpa sazy nata ypa châ mawh sy, a chô liata daihti miasari a leina taihta vaw khôpa ta.

²⁴ He he a chhopasiana cha a châ, hy beipa y, Chônôchaipa biepiepa, beichaipa ei beipa chô liata a vaw tlôpa cha a châ na;

²⁵ chyhsa hry tawhtapa topa châ aw chi ta, na pahrâna cha lyurâhpa sazy hry liata châ aw ta; viahchao hawhta sibiepa paniesapa châ aw chi ta, avâ diati ta padâpa châ aw chi ta, na chô liata daihti miasari a lei aw; Chônôchaipa chata chyhsazy abeina khihnarâh chô liata bie hnei ta, a khokheipa maih a pie tyh tahpa na pahno hlâ lei cha.

²⁶ A thabiapa pahlôh awpa ta bie ama vaw piepa hawhna khata avâ ta bie a hnei tahpa na pahno tawhna chata na khihnarâh cha nâma eih a châ ha aw.

²⁷ Chavâta hy beipa y, ei cha chhohiana bie he apyh tlâh awpa ta pachâ la; na moleina cha siana ta ri la, na hmoparaonazy cha chyhsa sipasapa chô liata zawngiahna ta ri teh, na hro lôhrâtlôna he a pasie thei ngyu aw ta,” tahpa ta a chhy ta.

²⁸ He zydua he Abei Nebukaneza chô liana chata a vaw tlô.

²⁹ Thla hrawhleino chhâna liana chata Babylaw beipa o chô liata abei cha a khie ngâ ta,

³⁰ abei chata, ‘’He Babylaw rôhnahpa he keima thatlôna tlaita abei pahrâna su châta nata ei rôhnahna angia nawpa ta ei taopa cha châ vei ma?” tahpa ta reih ta.

³¹ Cha bie cha abei pakah tawhta a pua hai nota, avâ tawhta ao za pua ta, “Hy Abei Nebukaneza y, nâ lâta bie a vaw tlô na: Abeina khihnarâh chata a châ nanosai haw,

³² chyhsapa hry tawhta topa châ aw chi ta, na pahrâna cha lyurâhpa sa hryta a châ aw; viahchao hawhta sibiepa paniesapa châ aw chi ta; na chô liata daihti miasari a lei aw; Chônôchaipa chata chyhsapazy abeina khihnarâh chô liata bie hnei ta, a khokheipa maih hnohta a pie tyh, tahpa na pahno hlâ lei cha,” tahpa ta.

³³ Cha nona tlai chata pachiana cha Nebukaneza chô liata thlai vaw tlô ta. Chyhsapa hry tawhtapa topa ta y haw ta, viahchao hawhta sibiepa nie ta, a pôhpa cha avâ diati ta padâpa ta y ta, a sâzy pahmôpi hmi hawhta seihpa ta nata a patozy pavaw pato hawhta a châna taihta.

³⁴ Cha nohzy chhâna lâna chata, kei, Nebukaneza chata avâ lâ mohmia pasaih na ta, ei novâhna cha kei lâta vaw kua ha heih ta. Chônôchaipa cha byhnâ aw na ta, a hroh thlâh hapa cha reithai na ta, za na ta; a ryureina cha chhâzaw ryureina châ ta, a khihnarâh cha chhâ y chhôh zydua châ tlôh ta;

³⁵ chhaolei a pahrâpa zydua he khâpa hrao leipa ta pachâpa châ ei ta, avâ pheisaih hrizy hry liata nata chhaolei a pahrâpazy hry liana chata ano reisai ta tao ta; ahyta hmahta a ku cha pahâsa thei leipa ei ta, a hnohta, “Nâma ta khâpa na tao?” chhao tah thei hra veih ei.

³⁶ Cha noh lilaw chata ei novâhna cha kei lâta vaw kua heih ta; ei khihnarâh rôhnah nawpa ta ei rôhnahna nata angiana cha kei lâta vaw kua haw hei ta. Ei ryraokheituhpazy nata ei chyhsa rôhnahpazy chata na vaw pangai heih ei ta, ei khihnarâh liana chata pa-ipa ta y na ta, rôhnahna thata baichhapa ta y na ta.

³⁷ Chatanachata kei, Nebukaneza heta avâ Beipa cha reithai na ta, pasâhsa na ta, za na ta; a hmotaopa zydua cha a do ta, a lâpizy cha sia tlôh ta; apalaipa ta a chareipazy cha a panawh thei.