Amosa 5

¹ Hy, Izarel chi saih u, he bie nâmo mâchhiesa nawpa ta ei reipa he thei teh u:

² “Laihsa Kôpa Izarel cha pao haw ta; a duah hei khao aw vei, a râh chô liata thypa a châ; ano padua awpa ta ahy hmah y veih ei,” tah ta.

³ Abeipa KHAZOHPA chata he tana heta tah tlôh ta: “Izarel chizy hnohna chata khihpi sâkha puana khata za kha siesai aw ta, khihpi za kha puana khata pahrawh a siesai aw,” tah ta.

⁴ ABEIPA chata Izarel chizy hnohna chata he tana heta tah tlôh ta: “Na tlua ula, nama hroh aw;

⁵ anodeikuacha Bethel tlua khah ula, Kilkal liata a ngia khah ula, Besheba lâta sie khah u; Kilkal cha sei ta patu tlai aw ei ta, Bethel cha khâpa hrao leipa a châ aw,” tah ta.

⁶ ABEIPA cha tlua ula, nama hroh aw; chata leipa ta cha Zawsi chhôhkha liata mei hawhta pua aw ta, kâ patlô aw ta, Bethel liata a pachhai awpa ahy hmah y aw veih ei,

⁷ ryureina hmo khâpa ta pachâsapa ta, siana cha alei liata a thy pathlahpa saih u!

⁸ Awhsicharu nata Vaothawlapiapa ataotuhpa nata thina nohpahlih my a pachâsatuhpa nata, chhô cha zâ zohpa ta a taotuhpa, tilaipi tizy awpa ta alei chô liata a palosatuhpa cha ano cha tlua ula, amo cha ABEIPA a châ,

⁹ kuh chô liata leidiana vaw tlôna taihta, chyhsa thatlôpazy chô liata leidiana a patlôsatuhpa cha.

¹⁰ Chhikao liata chhoreituhpa a hao ei ta, bie siapa a reituhpa cha pasie ei ta.

¹¹ Chavâta sipasapazy tlypâpa ta sa lapa eichi ta, alô daipa ta ozy sa eichi ta, châhrasala a chhôh liata pahrâ aw veih eichi; kresahdô ngiary chhihpazy tao eichi ta, châhrasala a kresawti doh aw veih eichi.

¹² Nama paraona hluhzie nata nama moleina hluhnazie pahno tlôh na ta; chyhsa siapazy taolapa ta, a ryruna lapa ta, chhikao liata phahlapazy ku hlaotlona a dythapazy saih u.

¹³ Chavâta chyhsa sopa cha cha hawhpa daihti liana chata a thlih thlâh ha aw ta; daihti pha leipa a châpa vâta.

¹⁴ Nama hroh thei nawpa ta pha leina tlua leipa ta, phana tlua ula; nama reipa hawhta, ABEIPA Pheisaihzy Khazohpa cha nama hnohta a y aw.

¹⁵ Moleina cha a hao ula, phana pasô ula, chhikao liata ryureina cha a ipa ta padua teh u; Zawsi mo a laibâhzy chô liana chata ABEIPA Pheisaihzy Khazohpa chata ngiachhiena a hnei ngyu aw la.

¹⁶ Chavâta ABEIPA, Pheisaihzy Khazohpa, Abeipa chata he tana heta a tah: “Tlyhmia kawhpa zydua liata thata sana y aw ta; othliah zydua liata, ‘A pei rimâ cha! A pei rimâ cha!’ tah aw ei ta. Pachârôh awpa ta lyu hneituhpazy nata thata sa awpa ta chaphôtu a thaipa ama aw awh,

¹⁷ kresahdô zydua liata thata sana y aw ta, nama hry liata sie palâh tlôh aw na ta, “ABEIPA ta tah ta.

¹⁸ ABEIPA noh a khohpa saih u, nama hu a po na! Khazia e ABEIPA noh cha nama khoh? Khaihna châ leipa ta zohna tlao a châna;

¹⁹ chakeibarôhneipa râsaipa ta chavyh atyhpa hawhta na ta, o liata a ngiapâ ta, pâhchhô chô liata ku pahniehpa ta parih ta a pachupa hawhpa cha a châ.

²⁰ ABEIPA noh cha khaihna châ leipa ta zohna châ aw vei ma? Zohna chha kalupa nata khaihna rai hnei leipa ta?

²¹ “Nama kyhchhizy a haopa ta, nawhtawna ta, nama pakhypi pathaisapazy liana chata aly hra aw va na.

²² Nama raopa hlâna nata niepa hlâna na hlâ hra ula, a pyh aw va na, nama sahroh thawpa adyhna hlânazy chhao khâpa sawta reih leipa aw na ta.

²³ Na totâ pyu ngiapa cha nahthlie aw va na; chavâta na hla palôhpasapa cha kei tawhtapa sie khei syulyu teh.

²⁴ Châhrasala ryureina cha tizy hawhta nata siana cha vahpi hawhta loh mawh sy.

²⁵ “Hy Izarel chhôhkhazy saih u, kô sypalih chhôhta râhpathohpa liana khata atheihnazy nata hmohlâpazy kei lâta nama vaw cheih ma?

²⁶ Nama beichaipa Saku nata khazoh nohthlahpazy, nama awhsi khazoh, âmosasy chata ataopa cha la eichi ta;

²⁷ chavâta Damaska khô lâta sei ta ei cha pasiesa aw,” ABEIPA a moh Pheisaihzy Khazohpa chata tah ta.