2 Samuel 22

¹ Chatawhcha Davi chata a khakhaipa zydua ku tawhtapa nata Sawla ku tawhtapa ABEIPA ta a pachha noh liana chata he hla bie he ABEIPA lâta reih ta.

² Ano chata, “ABEIPA cha ei lôpanô nata ei kuh nata na pabohtuhpa châ ta,kei eih tlai a châ,

³ ‘ei lôpanô, Khazohpa, ano cha ei ngâ aw, ei vyhphao nata ei pachhana ki, ei kuh sâhpa nata ei pabohna a châ, ei pachhatuhpa; nâma ta chyhsa nôchhina tawhtapa na pachha tyh chi ta.

⁴ Reithai tla ABEIPA cha pado aw na ta, chatanachata na dyuhtuhpa zy tawhtapa pachhapa ta ei y aw.

⁵ Thina chalâhparâpa chata na chadô ta, Khazohpa pachâ leina ti laipa chata na pachisa ta;

⁶ Sheol khawhri zy chata na chahry ta, thina khohei zy chata na ao ta.

⁷ 'Ei nôpopa ta ABEIPA cha pado tyh na ta; ei Khazohpa cha ei aw tyh. Ano chata achhyna-o tawhta ei ao thei ta, chatawhcha ei awna ao cha a nah liata a ngia ta.

⁹ Ahnapasu tawhta meikhu pua ta, a pakah liata a puapa mei chata kâ patlô ta; cha chata mei-ia chhao pati ngâ ta.

¹⁰ Ano chata avâ zy chhao pabô ta, Chô ta; a phei ry zy liana chata zohkaluhpa y ta.

¹¹ Cherubi chô liata kiah ta, a zaw ta;thlih mathlaw liana hmô ei ta.

¹² Zohna cha ano padôna byureih ta tao ta, tizy avâ liata meihdo chha kalupa zy cha pakhypa ta.

¹³ A hmiakô ta khaihna vâna chata mei-ia zy cha ia ta.

¹⁴ ABEIPA cha avâ liana khita paro ngâ ta, Chônôchaipa chata a ao papua ta.

¹⁵ Chatawhcha châtai zy cha ka ta, âmo sahlao papai ta, dôhla pathlisa ta, âmo patypamâ ta.

¹⁶ Cha pata nahta ABEIPA chhoreina vâta, a hnapasu liata hu puapa ta thata ahmôpa vâta tilaipi lona zy paluasapa ta, leilô bôna zy cha palâsapa ta y ta.

¹⁷ “Ano chata chôlâ tawhta paza ta, na patu ta, ti hluhpi tawhtapa nâ daophi ta.

¹⁸ Nâ dyuhtuhpa thatlô ngaitapa tawhta na pachha ta, nâ haotuhpa zy tawhtapa chhao; kei châta ama tha tlô tu tlôh ta.

¹⁹ “Âmo chata ei vâchhie noh liata na siehnao ei ta; châhrasala ABEIPA cha ei pahniehna chaipa a châ.

²⁰ Ano chata su kawh ngaitapa liata na chhihtha ta; ei chôta â lypa vâta eina pachha haw.

²¹ “ABEIPA ta ei siana zie lymâ hawhta ei chôta tao ta, ei kuzy a pathaihna zie lymâ hawhta eina thô.

²² ABEIPA lâpi zy cha a chhih na ta, ei Khazohpa tawhtapa cha molei ngaitapa ta pavia beih tlôh leipa na ta.

²³ A ryureina zydua ei hmiakô liata y tyh ta,a bieraopa zy cha a heisai beih tlôh leipa na ta.

²⁴ Ano liana chata eina hnei leipa châ hra na ta, ei hmoparaona tawhtapa a pananona ta.

²⁵ Chavâta ABEIPA chata ei siana zie lymâ hawhta na thô ta, a mohmô liata ei pathaih zie lymâ hawhta.

²⁶ “Zawngiah thei ngaitapa liana chata zawngiah thei ngaitapa ta a palâsa aw chi ta; seina a hnei leipa hnohta seina hnei leipa ta;

²⁷ mopathaipa liana chata pathaihpa ta palâsa aw chi ta, chyhsa chhorupa liana chata chhorupa ta na palâsa aw.

²⁸ Riethei a taopa chyhsa zy cha pachha haw chi ta, a palaipa zy deikua cha na panawhsa thei nawpa ta ama chô lâta na mo tawpâ chi ta.

²⁹ Hy ABEIPA y, ei meiôh châ tlôh chi ta, ABEIPA chata ei zona he a pavâsa aw.

³⁰ Nâma baona ta chariah adyuh tlôh na ta, ei Khazohpa baona ta kuh ei zawpakhô.

³¹ Khazohpa cha ano lâpi cha pha paki ta; ABEIPA bie cha pasia hawpa a châ; ano a ngâtuhpa zydua chata ano vyhphao a châ.

³² “ABEIPA leipa cha ahy e Khazohpa châ? Eima Khazohpa leipa ta cha ahy e lôpanô a châ?

³³ Khazohpa cha ei kuh a i ngaitapa châ ta, pha pakipa cha lâpi liata a chhihtha tyh.

³⁴ Ei pheizy cha sasu phei hawhta tao ta, ei su sâhpa zy liata eina paysa tyh.

³⁵ Ei kuzy he chariah ka nawpa ta pachu tyh ta, chatanachata ei bâh zy heta dawh libaw a kei thei.

³⁶ Nâ ta na pachhana vyhphao cha na pie chi ta, na reisina ta na palai chi ta.

³⁷ Ei keih chakâna su pakawh chi ta, chatanachata ei pheizy he a haih vei.

³⁸ Ei khakhaipa zy cha pha na ta, pahleipadia na ta, pahleipadiapa ta ama y hlâ lei cha kua va na.

³⁹ Ama thyu heih thei khao lei nawpa ta phie pahleipadia na ta, chhawh pathlah na ta; ei phei ry liata pao haw ei ta.

⁴⁰ Nâma ta adyuhna châta thatlôna ta ei chai na saih tlôh chi ta; nâ dyuhtuhpa zy cha ei ry liata panawh aw chi ta.

⁴¹ Nâ haotuhpa zy cha ei pahleipadia thei nawpa ta, nâ ta na dyuhtuhpa zy cha hnôh chhypa ta paysa haw chi ta.

⁴² Mohmia pasaih ei ta, châhrasala pachhatuh awpa ta ahyhmah y leipa ei ta; ABEIPA tlai cha moh ei ta, Châhrasala a chhy tlôh va.

⁴³ Cha pata nahta alei liata buhchâh hawh tlaita tu chheih na ta, tlyhmia chiatlao hawh tlaita tly na ta, hie khai na ta.

⁴⁴ “Nâ ta ei chyhsa zy atuna tawhtapa chhao na paboh haw chi ta; pho to luh châ awpa ta na pachha chi ta; ei pahno beih leipa pho chata eina chakao ha aw ei.

⁴⁵ Pho hropa zy cha kei lâta a pie aw ei ta, ei thâtih ama thei pata nahta ei bie amâ ngiah aw.

⁴⁶ Pho hropa zy cha dia aw ei ta, ama kuhzy tawhtapa cha a chalyuna chôta ama vaw pua aw.

⁴⁷ “ABEIPA cha a hroh na; ei lôpanô reithaipa ta y sala, ei pachhana lôpanô Khazohpa cha palyupalihpa ta y mawh sy,

⁴⁸ Phuh na lapa tuhpa nata pho to ei ry liata a panawh tuhpa Khazohpa tlai cha,

⁴⁹ ei khakhaipa zy tawhtapa na latuhpa; nâ ta na dyuhtuhpa zy chô lâna chata na chalo chi ta, chyhsa nôchhiepa tawhtapa cha na paboh tyh chi ta.

⁵⁰ “Chavâta hy ABEIPA y, pho to hry liata alyna bie ei cha hlâ, na moh reithaipa ta ei sa hra aw.

⁵¹ Ano chata pachhana rôhnah ngaipa ta abeipa pie tyh ta,a sathaw thupa chô liata Davi nata a pathlazy chô tlai liana chata chhâzaw ta a zawngiahna kyhpachazie a palâsa aw.