1
Cha leipa chhao cha Absalaw hnohta Ahithôphel chata, “Chyhsa thy kha nata sâh no a tlyh aw na ta, atazâ Davi a chadaipa ta ei pua aw na.
2
A riethei noh nata a tha chhâ noh tlaita pachhai aw na ta, ei pachisa aw; a hnohta chyhsa a ypa zydua cha a râpai aw ei ta. Chatanachata abeipa deita cha ei thie aw,
3
zawpizy cha nâ lâta ei vaw chhi khai aw, myuh cha myuh hneituhpa lâta a dipa hawhta. Chysa pakha dei hrona pahleipa nâ chhuahpa châ ta, chatanachata chyhsa zydua a dypa ta ama y aw,” tah ta.
4
Cha bie chata Absalaw nata Izarel machâ sahlao zydua cha palysa kaw ta.
5
Chatanachata Absalaw chata, “Arakhi chyhsa Husai cha aw tua ula, a reinazie eima nahthlie tua aw,” tah ta.
6
Husai ta Abasalaw lâ a vaw tlô nahta Abasalaw chata, “Ahithôphel ta he hawhna heta reih ta; a reipa hawhna heta eima tao aw ma? tao leipa châ ei sih la, nâma ta duah vaw reih hra tua,” tahpa ta chho ta.
7
Chatawhcha Husai chata Absalaw hnohta, “Atahmâ tahpa liana heta Ahithôphel aryhna a raopa he pha vei,” tah ta.
8
Husai chata, “Na paw nata a chyhsa zy cha pahno chi ta, pheisaih riahpha ngaitapa, chyhsa chhyu ngaitapa, sibiepa su liata chavyh a taw lapa hawhpa châ ei ta. Chatawhcha na paw cha adyuhpa chyhsa châ ta; zawpi hry liata a rie ngyu aw vei.
9
Atahmâ chhao khataih khaohtlô liata tlyma, khataih su liata tlyma a nyu thlâh hapa a châ aw. Chatawhcha amâ dyuh tua nota chyhsa thokha ama pao hôlô khiahtala a theipa maihta, Absalaw a zituhpazy cha thata ama thie tah aw ei ta.
10
Chatanachata chyhsa riahpha ngaitapa chakeibarôhneipa palôh a phaohpa chyhsa, na paw cha pheisaih riahpha ngaitapa a châpa nata a hnohta chyhsa a ypa zy cha chyhsa riahpha ngaitapa sai ama châpa pahno khai tlôh ei ta.
11
Kei aryhna taona zie cha Izarel chyhsa zydua Dana tawhta Besheba taih tlaita tilaipi sadi zie tlaita nâ lâta awpakhy khai ei sih la, chatawhcha adyuhna liana chata nâma tlai sie hra la.
12
Chatanachata khataih su liata rai eimâ tyhna maih liana chata alei liata diati a tlapa hawh tlaita tla hnao aw pi ta; ano nata a hnohta a ypa zydua cha pakha hmah pahlôh aw ma pi.
13
Cha leipa chhaota, khih liata â ngia khiahtala Izarel chyhsa zydua khawhri a cheipa ta cha khih lâna chata vawh aw pi ta, lôchapo dikaripa chhao a y khao leina taihta chavah lâta eimâ daophi khai aw,” tah heih hra ta.
14
Chatanachata Absalaw nata Izarel chyhsa zydua chata Arakhi chyhsa Husai aryhna a raopa cha Ahithôphel aryhna a raopa hlâta a pha via,” tah haw ei ta. ABEIPA chata Absalaw chô liata hmopha leipa a patlôsa thei nawpa ta ABEIPA chata Ahithôphel aryhna raopa pha ngaitapa cha pazei awpa ta a vaw rao hawpa rai a châ.
15
Chatanachata Husai chata theihthaipa Zadôka nata Abiatha hnohta, “Cha hawhna chata Ahithôphel chata Absalaw nata Izarel machâ zy châta aryhna rao ta; keima ta cha hawhna chata aryhna rao na ta.
16
Chavâta atazâ cha râhpathohpa liata chavah lâkia zy liata a rie khao leipa ta chaka tlai teh u; chata leipa ta la abeipa nata a hnohta a ypa zydua cha ama pahleipadia khai pathlei aw na,’ tahpa ta Davi thlai pachhosa teh u,” tah ta.
17
Zawnatha nata Ahimaza cha Enrokel liata y ei ta; seichanô pakha ta âmo cha chho tyh ta, âmo chata abeipa Davi cha chho pachhuah tyh ei ta; khihpi liata amâ ngiapa cha ahyhmah hmô lei awpa châ ta.
18
Châhrasala hawtipa ta vaw hmô ta, Absalaw chho ta; ama pano ta thlai a râ syulyu haw ei ta, Bahuri liata chyhsa pakha a tlyhmia liata tikhaorei a hneipa o lâta vawh ei ta; tikhaorei liata a ngia haw ei ta.
19
Chatawhcha chanô ta tikhaoh rei phiehru ta pahru ta, a chô liana chata sâh zawh ta; ahyhmah pahno theipa châ vei.
20
Absalaw chakaotuhpa zy cha o liata chanô lâna chata vawh ei ta, “Ahimaza nata Zawnatha kha khataih lâ ama vawh?” tah ei ta. Chatawhcha chanô chata ama hnohta, “Chavah ama chaka bâ aw,” vaw tah ta. Chatawhcha tlua ei ta, hmô leipa ei ta, Zerusale lâta kua haw ei ta.
21
Ama siepakhô tawhna chata tikhaoh rei tawhtapa cha vaw pua ei ta, abeipa Davi cha kei chho ei ta. Davi hnohta, “Pua ula, chavah chaka parah teh u; he hawhna heta Ahithôphel chata a cha teih ei,” tah ei ta.
22
Chatanachata Davi nata a hnohta chyhsa a ypa zydua cha pua ei ta, Zawdâh chaka ei ta; khih a vaw deih nata pakha hmahta Zawdah a chaka leipa y veih ei.
23
Ahithôphel ta ano ta a ryhna a raopa hawhna cha zyh veih ei tahpa a pahno nahta, alâ cha a ky padia ta, pua ta, a khih lâta a di ta. A chhôhkha zy khihsana zie awpa a siapa ta rao ta, a pa-aosao haw ta; thi ta, a paw thlâ liata pabu haw ei ta.
24
Chatanachata Davi chata Mahanai kei tlô ta. Absalaw chata a hnohta Izarel chyhsa zydua chhaota Zawdah chaka ei ta.
25
Chatawhcha Absalaw chata Zôaba vyuhpa ta Amasa cha pheisaih zy hyutuhpa ta soh ta. Amasa cha chyhsa pakha a moh Ithara Izarel chyhsa Zôaba nô Zeruia narônô Nahasa sawchanônô Abikai a hneituhpa sawchapawpa châ ta.
26
Chatawhcha Izarel chyhsa zy nata Absalaw chata Kilia râh liata riehmo tao ei ta.
27
Davi ta Mahanai a vaw tlô nahta Amawna pathla Rabah, Nahasa sawchapawpa Shôbi zy, Lôdeba khihpa Amiel sawchapawpa Makhia zy, Rôkeli khihpa Kilia chyhsa Barzilai zy chata,
28
Zawpizy cha râhpathohpa liana chata âmo nodipa ta, panaopa ta, ama dâh a phi ngaita,” ama tahpa vâta hmophaw zy, kawmaw zy, rahô zy, alei beih zy, sâh zy, bali sâh zy, viahchhâ pakâhpa zy, abia zy, abie zy, a biah chateipa zy,
29
kheihti zy, sâhpiti kuapa zy, mietahkupa nata viahchao sâhpiti kuapa zy Davi nata a hnohta chyhsa a ypa zy nie awpa ta vaw cheih ei ta.
