1 Samuel 17

¹ Philistina mozy chata adyuh awpa ta ama pheisaih zy pakhy chaimâh ei ta; Zudah râh chhôh Sôkô khih liata a pahmaohpakhy ei ta, Ephedami su liata Sôkô khih nata Azekah khih likawh liata riehmo tao ei ta.

² Sawla nata Izarel mozy cha a pahmaohpakhy ei ta, Elah saikao liata riehmo tao ei ta, Philistina mozy a chykhâh nawpa ta a paziah ei ta.

³ Philistina mozy cha tlâh baikhaihpa liata y ei ta, Izarel mozy cha hiakha lâ tlâh baikhaihpa liata y ei ta, ama likaw liana chata saikao y ta.

⁴ Philistina mozy riehmo tawhna chata ama chyhsa thatlôpa Kôliatha, Katha khihpa dy charu nata kha kha a sâhpa he vaw pua ta.

⁵ Dawh lakhu a khu ta, thua viahpakao a ky ta, a thua viahpakao â hrina zie cha dawh sekel sa pangaw châ ta.

⁶ A ngialy liana chata dawh a paky ta, a ky liana chata dawh asei chyhpa a vao ta.

⁷ A asei bi cha thaisana bâ tlâh hawhta châ ta, a asei thua cha thua sekel za charu a hripa châ ta; a vyhphao a chabatuhpa cha a hmia lâta sie ta.

⁸ A duah ta Izarel sahlao pheisaih zy cha awsao ta, ama hnohta, “Khazia adyuh awpa ta namâ vaw paziah? Kei Philistina chyhsa, nâmo Sawla chakaotuhpa châ veih eichi mâ? Chyhsa atlyh ula, kei lâta a zu mawh sy.

⁹ Kei nâ dyuhpa ta eina thie khiahtala nama chakaotuhpa ta y aw pi ta; anodeikuacha kei ta pahniepa ta ei thie khiahtala eima chakaotuhpa ta y aw eichi ta, maniah nama chakao aw,” tah ta.

¹⁰ Philistina chyhsa chata, “Atanoh heta Izarel sahlao pheisaih zy cha ei pahao; chyhsa pakha vaw papua ula, eimâ dyuh aw,” tah ta.

¹¹ Sawla nata Izarel sahlao zydua ta cha Philistina chyhsa bie reipa cha ama thei nahta thlahzopa ta chi ngaita ei ta.

¹² Davi cha Zese sawchapawpa châ ta, ano cha Bethlehe Zudah liata Ephratha chyhsa kha châ ta, sawchapawpa pacharie hnei ta. Ano cha Sawla abei nona chata pawpi ngaitapa cha haw ta, machâ ngaitapa ta pachâpa châ haw ta.

¹³ Zese sawchapawpa uhtheipa zy pathôh chata adyuhna liata Sawla zi ei ta; a sawchapaw pathôh adyuhna lâta a siepa zy moh cha a uhthei chaipa Eliaba zy, a pazipa Abinada zy, a pathôhna Samah zy ama châ.

¹⁴ Davi cha a seihnai chaipa châ ta; a uhtheipa zy pathôh chata Sawla zi ei ta.

¹⁵ Davi cha Sawla tawhta Bethlehe lâ a paw mietahkupa mohôhpa ta vawh tyh ta.

¹⁶ Philistina chyhsa chata my nata zâlâ maihta a kei hnia tyh ta, noh sypalih chhôh a kei chaluah tyh ta.

¹⁷ Zese chata a sawchapawpa Davi hnohta, “Sâh raopa ephah hmo kha nata he viahchhâ tlâ hrawh he cheih la, na unawhpa zy lâta âmo riehmo lâta vaw khei parah teh.

¹⁸ sâhpiti kuapa tlo hrawh he ama py liata sâh kha hyutuhpa cheipa la. Na unawhpa zy kheihta ma ama y hiahri la, ama thâtih pahnona vaw tlôkhei mah y,” tah ta.

¹⁹ Sawla nata âmo nata Izarel mo zydua cha Philistina mozy adyuhpa ta Elah saikao liana chata ama y.

²⁰ Davi cha mydi ta thyu ta, mietahkupa zy cha vaihtuhpa pakha pavaosa ta, Zese ta bie a piepa hawhna khata phaoh ta, sie haw ta; adyuhna su lâta a pua haipa pheisaih zy cha adyuh awpa ta ama aw ngâ nona tlaita, ano cha talaili yna su cha kei tlô ta.

²¹ Izarel mozy nata Philistina mozy cha adyuh awpa ta a paziah ei ta.

²² Davi cha ta a hmodâh a mokhâhtuhpa hnohna chata soh ta, pheisaih lâna chata a kei râ ta, a uhta zy cha a kei naoh ta.

²³ Âmo bie â chho nona chata ama chyhsa thatlôpa Katha khihpa Philistina chyhsa, a moh Kôliatha cha Philistina mozy pheisaih hlao hry tawhta vaw pua ta, a bie rei tyhpa kha vaw reih ta, cha cha Davi chata thei ta.

²⁴ Izarel mo zydua chata cha chyhsa ama hmô nahta, a râpai ei ta, chi ngaita ei ta.

²⁵ Izarel mozy chata, “Kha chyhsa a vaw puapa kha nama hmô ma? Izarel mozy pahao awpa ta a vaw pua; ahyrai ano a thiepa maih cha abeipa ta thata sôh lâta pahneirôhsa aw ta, a sawchanônô pie aw ta, chatawhcha a paw chhôhkha cha Izarel sahlao hry liana heta khotalaipa ta a paysa aw,” tah ei ta.

²⁶ Davi chata a kiapâh liata a duahpa zy hnohna chata. “He Philistina chyhsa he thiepa ta Izarel sahlao mohchhiena a pahleituhpa cha kheihta tao awpa a châ aw? He chopawtai leipa Philistina chyhsa he ahyma châ ta, Khazohpa hrohpa pheisaih zy zua a pahao tly?” tah ta.

²⁷ Zawpi zy chata he hawhna heta a chhy ei ta, “A thietuhpa maih cha eima rei hawpa hawhna khata taopa a châ aw,” tah ei ta.

²⁸ A uhta uhthei chaipa Eliaba ta chyhsa zy hnohta a bie rei haipa cha vaw thei ta; Eliaba cha Davi chô liana chata a pathi-ia ta, “Khazia ma na zu hra? Râhpathohpa liata mietahkupa zy a chyhta a ypa kha ahyma na pavaisa? Nâ palaizie nata na palôhrupa pha leizie ei pahno; adyuhna mo awpa ta a zu chakhy chi ta,” tah ta.

²⁹ Davi chata, “Khâpa ei tah tly? A chhâpa a ypa châ vei mâ?” tah ta.

³⁰ Ano chata mo hropa lâ a heisai ta, a reih tyhpa thlyu reih heih ta; zawpi zy chata hmia lâta ama chhypa hawhna khata a chhy heih ei ta.

³¹ Davi bie reipa cha ama thei nahta, Sawla lâta reih pachhuah ei ta; ano chata aw ta.

³² Davi chata Sawla hnohta, “Ano vâna chata ahyhmah ta palôh duapa ta y kha ei se; na chakaotuhpa heta cha Philistina chyhsa cha ei kei dyuh aw,” tah ta.

³³ Sawla chata Davi hnohta, “Nâ la, Philistina chyhsa adyuh awpa chata sie thei aw va chi; thyudyupa deita châ tlôh chi ta, ano la a thyudyu ta tawhta adyuhpa chyhsa châ tlôh ta,” tah ta.

³⁴ Davi chata Sawla hnohta, “Na chakaotuhpa heta ei pâ mietahkupa vaih tyh na ta; chakeibarôhneipa tlyma, chavyh tlyma a vy ta, mietahkupa zaw hry tawhtapa mietahkupa taw a la nona heta.

³⁵ a chadai na ta, a pakah tawhtapa cha ei pachha tyh mâ tâh; eina thyuhnao nota a barôh ta patu na ta, tu sao na ta, ei thie tyh.

³⁶ Na chakaotuhpa heta chakeibarôhneipa nata chavyh zy thie haw tyh na ta; cha chopawtai leipa Philistina chyhsa cha âmo hawhta a châ thlâh ha hra aw, Khazohpa pheisaihzy zua pahao bao hra ta,” tah ta.

³⁷ “Davi chata, “Chakeibarôhneipa ku tawhtapa nata chavyh ku tawhtapa na pachhatuhpa ABEIPA chata cha Philistina chyhsa ku tawhtapa cha eina pachha aw,” tah ta. Sawla chata Davi hnohta, “Sie la, na hnohta ABEIPA y lah vâ!” tah ta.

³⁸ Sawla chata Davi cha ano chariah chhaichhi paky ta; dawh lakhu pakhusa ta, thua viahpakao pakysa ta.

³⁹ Davi chata a chariah chhaichhi chô liana chata a zaozi a vao ta, sie a chhuah ta, cha hawhna chata atao beih tlôh lei khâh ta, Davi ta Sawla hnohta, “Siekhei thei cheita aw va na; he hawhna heta tao beih va na,” tah ta. Davi chata pahluh haw ta.

⁴⁰ A chôhchahrei chaba ta, chavah liata alô mihpa miapangawh a tlyh ta, mietahkupa vaina sahria, a sahria liana cha a vao ta, a vawna cha chaba ta, Philistina chyhsa cha a kei hnia ta.

⁴¹ Philistina chyhsa cha a vy lymâ ta, Davi cha a vaw hnia ta, vyhphao a chabatuhpa cha a hmiakô liata sie ta.

⁴² Philistina chyhsa chata a vaw heih ta, Davi a vaw hmô nahta mohnao kaw ta; sia vovâpa, mopadei angia ngaitapa, thyudyupa dei châ tlôh ta.

⁴³ Philistina chyhsa chata Davi hnohta, “I ma châ na ta, chôchahrei ta ei naw pangai chi?” tah ta. Philistina chyhsa chata a khazoh zy reipa ta Davi cha chhie sapa ta.

⁴⁴ Philistina chyhsa chata Davi hnohta, “Avy teh, na sapa zy cha avâ pavaw zy nata lyurâhpa sazy ei paniesa aw,” tah ta.

⁴⁵ Davi chata Philistina chyhsa hnohta, “Na cha zaozi zy, asei zy, asei chyhpa zy chabapa ta vaw pua chi ta; kei la, Pheisaih zy ABEIPA, Izarel pheisaih zy Khazohpa, na pahaopa moh ta tlao ei vaw pua.

⁴⁶ Atanoh he ABEIPA ta nâma he ei ku liata eina pie aw, cha thie aw na ta, na luh ei cha tai aw; chatawhcha Philistina pheisaih sahlao rizy cha atanoh he a vâ pavaw zy nata lyurâhpa sazy ei paniesa aw; chatanachata alei chô liata chyhsa zydua heta Izarel sahlao hry liana heta Khazohpa a y tahpa cha pahno thei aw ei ta.

⁴⁷ he liata a hmaohpakhypa zydua heta ABEIPA chata zaozi nata asei ta pachha vei tahpa pahno thei aw ei ta; adyuhna cha ABEIPA eih châ tlôh ta; ano chata eima ku liata nâmo sahlao he maniah a pie aw,” tah ta.

⁴⁸ Philistina chyhsa cha vaw pua ta, Davi adyuh awpa ta a vaw hnia nahta Davi cha pheisaih sahlao lâna chata Philistina chyhsa cha adyuh awpa ta thlai a kei râ ta.

⁴⁹ Davi chata a sahria cha chapao ta alô thaoh ta, a vawna chata kei vawh ta, Philistina chyhsa cha a khi liata khai ta; a khi liana chata alô cha angia ta, â khu lâta pao ta.

⁵⁰ Cha hawhna chata Davi ta Philistina chyhsa cha a vawna nata alô ta pahnie ta, Philistina chyhsa cha vawh ta, thie haw ta; Davi chata zaozi rai a chei leipa ta.

⁵¹ Chatanachata Davi cha a râ ta, Philistina chyhsa kiapâh liana chata a kei duah ta, a zaozi cha la ta a paih tawhta phia ta cha chata thie ta, a luh tai haw ta. Philistina chyhsa zy ta ama chyhsa thatlôpa cha a thi tahpa ama pahno nahta, a râpai haw ei ta.

⁵² Izarel mo nata Zudah mozy cha thyu ei ta, awh ei ta, Philistina mozy cha Katha taihta nata Ekraw kuh ochhi taih tlaita a râ ei ta, Philistina mozy hry liata hmah phaohpa sahlao cha Shaarai lâpi tlykha ta Katha nata Ekraw taihta thata pao ei ta.

⁵³ Izarel pathlazy chata Philistina mozy amâ chadaipa cha kuasai ei ta, ama riehmo cha hrao haw ei ta.

⁵⁴ Davi chata Philistina chyhsa luh cha la ta, Zerusale lâ siekhei ta; a chariah chhaichhi deikua cha a poh-o liata soh ta.

⁵⁵ Sawla ta Philistina chyhsa adyuh awpa ta Davi a siepa a hmô nona khata, pheisaih hyutuhpa Abne hnohta, “Abne, he satliapa he ahy saw ma?” tah ta. Abne chata, “Na hrona reipa ta ei reih, hy abeipa y, pahno cheita va na,” tah ta.

⁵⁶ Abeipa chata, “He hawti he ahy saw ma, hiahri teh u,” tah ta.

⁵⁷ Davi, Philistina chyhsa a thiepa a vaw tlôpa cha Abne chata a chhi ta, Philistina chyhsa luh chabana chôta Sawla lâna chata vawkhei ta.

⁵⁸ Sawla chata a hnohta, “Ahy sawchapawpa ma na châ tly, satlia pa?” tah ta. Davi chata a chhy ta, “Bethlehe chyhsa na chakaotuhpa Zese sawchapawpa ei châ,” tah ta.