Mika 1

¹ Zudah bei Zawtha zy, Ahaza zy, Hezekiah zy abei nota Môreshe chyhsa Mika hnohta ABEIPA bie a vaw tlôpa, Samari nata Zerusale kyh ta a hmôpa cha.

² Nâmo chizy saih u, nama zydua ta thei ula, aleilô nata a chhôh liata a ypa zydua saih u, Abeipa KHAZOHPA, Abeipa cha a achhyna-o pathaihpa tawhta, nâmo chakhiapa ta, nâmo kyh liata a pahnosatuhpa châ mawh sy.

³ Pachâ teh u, ABEIPA cha a su tawhta vaw pua ta, za chô aw ta, alei su a sâhpazy cha thy tlôh aw ta.

⁴ Mei kiapâh liata kheihlô hawhta nata pâhdawhpa liata ti a chakhaopa hawhta, tlâhzy cha a ry liana chata zao aw ei ta, saikaozy cha ama kaichhei aw.

⁵ He zydua he Zakaw sahlao paraona vâta nata Izarel chhôhkhazy moleina vâta a châ. Zakaw sahlao paraona cha khâpa a châ? Samari châ vei ma? Zudah sahlao moleina o cha khataih liata e? Zerusale châ vei ma?

⁶ Chavâta Samari cha sibiepa su liata hmo chhiepa pahmaohpa hawhta tao aw na ta, kresahdô su hawh tlai ta; cha su liata alôzy cha saikao lâta pahluah aw na ta, a lôbôpazy cha ei palâsa aw.

⁷ A khazoh nohthlahpa zydua cha pakei khaipa châ aw ta, a sihryna ty cha mei ta rao khaipa châ aw ta, a khazoh nohthlahpa zydua cha roryhrapa ta ei tao aw; sihryna ty ta a pakhypa châ tlôh ta, sihryna ty ta ama cha heih hra aw.

⁸ He vâna heta cha aw na ta, thata sâh aw na ta; a hlaipa nata thluahruapa ta ei y aw; sihâ hawhta awh aw na ta, pavawpi hawhta ei rôh aw.

⁹ A hmahzy cha patlâh theipa châ vei; Zudah râh tlô tlôh ta; ei chyhsazy chhikao, Zerusale tlai chhao a tlô.

¹⁰ Katha lâta chho khah ula, cha cheita khah u; Bethaphrah liana chata buhchâ liata ei hluah.

¹¹ Hy Saphi chyhsa, thluahruapa nata noza ngaitapa ta sie syulyu teh; Zaana chyhsa cha vaw pua vei; Bethezel mâchhiesana chata nâma tawhta a duana su a cha lapa aw ei.

¹² Marô chyhsa chata tovyuh phapa to a ngiatiah leipa ta a y, ABEIPA tawhta hmopha leipa cha Zerusale chhikao kiapâh taihta a vaw tlôpa vâta.

¹³ Hy Lakisa chyhsa, talaili cha arâ chahrapa liana chata buh teh; ano he Zaio sawchanô moleina thabypa a châ, Izarel sahlao hmoparaonazy cha nâma liana heta a vaw ypa châ tlôh ta.

¹⁴ Chavâta Môresheka hnohna chata a pathliena hmopiepa na pie awpa a châ; Akziba ozy cha Izarel râh abeizy chata dôna a châ aw.

¹⁵ Hy Maresha chyhsa, nâma cha hneituh awpa nâ lâta ei vaw chhihtha aw; Izarel sahlao rôhnahna cha Adula taih tlaita a vy aw.

¹⁶ A pôlôpa ta a tao la, na saw kho ngaitapazy vâna chata a pôlôpa ta a ngyu teh; vâkhie hawhta thata a papôlô teh; nâ tawhtapa seichâna ta chhihthapa ta y haw tlôh ei ta.