Mathai 28

Проучване

   

1 Pahânoh khai tawhta, noh sari noh liata noh hmiatua chaipa khihpavâ nota, Madali nata Mari hropa cha thlâ moh awpa ta vawh ei ta.

2 Alo thata a vaw sih ta; Abeipa vâlyuhchâpa avâ tawhta za chô ta, alo cha pasih ta, a chô ta a tyuh ta.

3 A hmia yzie cha dôhla pathliepa hawhta châ ta, a chysia cha dâhaw hawhta ngyuh ta.

4 Ano ama chipa vâta a vaihtuhpazy cha a chalyu ei ta, a thihpa hawhta y ei ta.

5 Châhrasala vâlyuhchâpa chata chanôzy hnohta, “Chi kha u; Zisu ama khaipâpa cha nama tlua tahpa pahno tlôh na ta.

6 Ano cha he liana heta y khao vei; a reipa hawhta a thyu haw. A vy ula, a ziana su he moh teh u.

7 Chatanachata sie parah ula, a pachupazy kei chho teh u, athihpa hry tawhtapa thyu heipa ta y ta, nama hmiakô ta Kalili râh lâta a sie hai; cha liana chata ano cha nama hmô aw. Nahthlie teh u, ei cha chho haw ei chuh,” tah ta.

8 Chatanachata china nata thaphana chôta, thlâ tawhna chata a pachupazy chho awpa ta thlai a râ ei ta.

9 Chatawhcha Zisu ta âmo a tyh ta, “Palôhtlâhpa ta y teh u,” tah ta. Chatawhcha a vy ei ta, a pheizy patu ei ta, ano a naoh ei ta.

10 Zisu ta ama hnohta, “Chi kha u, sie ula, ei unawhpazy hnohta Kalili lâta sie awpa ta chho ula, cha liana chata eina hmô ei,” tah ta.

11 Chanôzy cha ama sie hai nota vaihtuhpa thokha cha khihpi liata a vaw ngia ei ta, hmo a vaw ypa zydua cha theihthaipa beizy chho ei ta.

12 Theihthaipa beizy cha machâzy chhaota a pahmaoh ei ta, a patlapasao ei ta, pheisaihzy hnohta tâkâ hluhpi pie ei ta,

13 Vâtlâhzy hnohta, ‘Zâ ta eimâ mô chhôhta a pachupazy a vy ei ta, ama paru haw,’ tah teh u,” tah ei ta.

14 Chatawhcha ryureituhpa ta a pahno ha khiahtala ano cha a palôhpatlâhsa aw pi ta, nâmo cha tymâ aw veih eichi,” tah ei ta.

15 A vaihtuhpazy ta tâkâ cha la ei ta, ama chhopa hawhna chata tah ei ta; atahmâ taihta cha bie cha Zuzy hry liata khâ a pathâh.

16 Pachupa pahrawhleikhazy cha Kalili liata Zisu ta tlâh a raopa lâna cha sie ei ta.

17 Ano ama hmô nahta a naoh ei ta; châhrasala thokhazy chata a 1ôh leipa ei ta.

18 Zisu cha ama hnohta a vy ta ama hnohta, “Alei nata avâ liata biehneina zydua ei hnohta piepa a châ haw.

19 Chatanachata sie ula, pho to pachupazy ta tao ula, Paw nata Sawchapawpa nata Thlahpa Pathaihpa moh ta a bâti teh u,

20 bie ei cha piepa zydua kha a vaopa ta pachu teh u; nahthlie teh u, chhâzaw chhâna taihta nama hnohta ei y thlâh ha aw, khizaw chhâna taih chhaota,” tah ta.;

Scroll to see more.