8822. ‘Et tremiscebat totus mons valde’: quod significet caeli commotionem, constat ex significatione ‘tremiscere’ quod sit commotio, et ex significatione ‘montis Sinai’ quod sit caelum, de qua n. 8805; quod ad praesentiam Divini sit commotio, videatur supra n. 8816.

2849. ‘Tanquam stellas caelorum’: quod significet multitudinem cognitionum boni et veri, constat ex significatione ‘stellarum’ quod sint cognitiones boni et veri, de qua n. 1808, 2495. Spirituales sunt qui in Verbo passim comparantur stellis, et hoc a cognitionibus boni et veri quae illis, non autem caelestes, quia his non cognitiones sed perceptiones; et praeterea quia stellae illuminant noctem, est enim spiritualibus lux nocturna qualis a luna et stellis respective ad lucem diurnam in qua sunt caelestes; quod spiritualibus obscurum respective sit, videatur n. 1043, 2708 pr. , 2715.